काठमाडौं (हाम्रो खेलकुद) – नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) ले वर्षेनी आयोजना गर्दै आएको एनएनआइपिए वर्ष सर्वाेत्कृष्ट खेलाडीले जनही १ लाख पुरस्कार पाउने भएका छन् ।

आयोजकले आइतबार राजधानीमा पत्रकार सम्मेलनको आयोजना गर्दै प्रतियोगिताको सर्वाेत्कृष्ट मध्येको सर्वाेत्कृष्ट महिला र पुरुष खेलाडीले जनही १–१ लाख पुरस्कार पाउने जानकारी गराए ।

यसका लागि एनएनआइपिएले आइतबारै जनता बैंक लिमिटेडसँग १० लाख रुपैयामा पाँच वर्षे प्रायोजन सम्झौता गरेको छ । वर्षको सर्वाेत्कृष्ट खेलाडीको पुरस्कार रकम जनता बैंकले प्रदान गर्नेछ । यो प्रायोजन रकम जनता बैंकले पाँच वर्षसम्म प्रदान गर्नेछ ।

सम्झौतामा एनएनआइपिएका अध्यक्ष दीपक श्रेष्ठ र जनता बैंकका सहायक सिइओ अजय मिश्रले हस्ताक्षर गरे । सम्झौतापछि बैंकका सहायक सिइओ अजय मिश्रले एनएनआएपिए अवार्डसँग जोडिन पाउदा खुशी लागेको र यसलाई निरन्तरता दिदै जाने बताए ।

एनएनआइपिएका अध्यक्ष दीपक श्रेष्ठले एनएनआइपिए अवार्डको दायरा विस्तारै बढ्दै गएको र जनता बैंकको साथले झनै उत्साह मिलेको बताए ।

एनएनआइपिए अवार्ड यही पुस १३ गते ललितपुर महानगरपालिकास्थित ललितपुर संग्रहालयमा हुनेछ । प्रतियोगितामा विभिन्न २९ खेलका १–१ जना खेलाडीहरु सम्मानित हुनेछ । यही सर्वाेत्कृष्ट मध्येबाट १–१ जना खेलाडीबाट सर्वोत्कृष्ट खेलाडी चुनिनेछ ।

सोही अवार्ड समारोहमा १ जना आदर्श खेलाडी, तथा एक जना खेलकुद पत्रकारलाई एनएनआइपिए खेल पत्रकारिताबाट पुरस्कृत गरिने आयोजकले जनाएको छ ।