काठमाडौं (हाम्रो खेलकुद) – युवा ब्याडमिन्टन स्टार प्रिन्स दाहाल राजधानीमा जारी योनेक्स सनराइज अन्नपुर्ण नेपाल इन्टरनेसनल ब्याडमिन्टन सिरिज अन्तरगतको पुरुष एकलमा सेमिफाइनलमा पुग्ने एक्ला नेपाली खेलाडी बनेका छन् ।

त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा शुक्रबार भएको पुरुष एकलमा युवा स्टार प्रिन्सले नेपालकै नवीन श्रेष्ठलाई २–१ को सेटमा पराजित गर्दै सेमिफाइनलमा पुग्ने एक्ला नेपाली खेलाडी बनेका हुन् । प्रिन्सले पहिलो सेट १८–२१ ले गुमाएपनि त्यसपछिको सेट २२–२० र २१–१५ ले आफ्नो पक्षमा पारेको थियो ।

नेपाल नम्वर वान रत्नजित तामाङ भारतका स्वर्णराज बोरासँग २१–१३ र २६–२४ को प्रतिस्पर्धात्मक सेटमा पराजित भए । दोस्रो वरीयताका दिपेश धामी कार्तिके गुल्सान कुमारसँग २१–१३ र २१–१२ को सोझो सेटमा पराजित भए । मलेसियाका सेङ जोइ यओले बंगलादेशका मोहम्मद सलमान खानलाई २१–१० र २१–११ ले हराएर सेमिफाइन्लमा स्थान पक्का गरे ।

महिला एकलमा भने नेपालको चुनौती सकिएको छ । नेपाली सीता राई जापानी युरी नाकामुरासँग २१–६ र २१–९ को सेटमा पराजित भइन् । सीमा राजवंशी चाइनिज ताइपेइका यु चियसँग २१–७ र २१–९ ले पराजित भइन् ।

पुरुष डबल्समा रत्नजित तामाङ र दिपेश धामीको जोडीले नेपालकै इरफान अन्सारी र रियाज अन्सारीको जोडीलाई २१–१८ र २१–७ ले पाजित गर्दै सेमिफाइनलमा पुग्न सफल भए । नेपालकै बिकास श्रेष्ठ र बिजित थापामगरको जोडीले भारतका हिमांशु मित्तत र शुभम शर्मालाई १६–२१, २१–१५ र २१–११ ले पराजित गर्दै अन्तिम चारमा पुग्न सफल भए ।

मलेसियाका इजात फरहान अजहर र जाचारी चोइङ सेन सियाको जोडीले भारतका प्रतिक रनादे र अक्क्षन सेट्टीको जोडीलाई २१–१७ र २१–१७ ले तथा भारतक रोहन कपुर र सौरभ शर्माको जोडीले नेपालका प्रिन्स दाहाल र नवीन श्रेष्ठको जोडीलाई २३–२१ र २१–४ ले हराउदै अन्तिम चारमा पुग्न सफल भए ।

महिला डबल्स्मा नेपालकी पुजा श्रेष्ठ र नङ्शल तामाङको जोडीले नेपालकै सफी खत्री र लोकथमा राईको जोडीलई २१–१०, २१–११ ले हराए । अर्को खेलमा नेपालका जेसिका गुरुङ र अनुमाया राईको जोडीले नेपालकै शोभा गौचन र अमिता गिरीको जोडीलई २१–१८, २१–१३ को सेटमा पाखा लगाए । अर्को खेलमा नेपालकी सिता राई र सम्झना शर्माको जोडीले तारा आल र मनिषा खड्काको जोडीबाट वाकओभर पाए ।

मिक्स डबल्समा नेपालका रत्नजित र नङ्सलदेवीको जोडीले भारतका कृतेश धिन्दवाल र अनुभा कौसिकको जोडीलाई २१–१० र २१–१३ ले पराजित गर्दै सेमिफाइनलमा पुग्न सफल भए । दिपेश र शोभाको जोडी सौरभ शर्मा र अनुष्का पारिखको जोडीसँग २१–११ र २१–१० को सेटमा पराजित भए ।

गौतम कठायत र सम्झना शर्माको जोडी थाइल्यान्डका बोवर्नवान्तानुवोङ फुथापन इन्डोनेसियाका रिरिन एमेलियाको जोडीसँग २१–११ र २१–१४ को सेटमा पराजित भए । नवीन श्रेष्ठ र अनुमाया राईको जोडी भारतका भेनकाट गौरभ प्रसाद र जुही देवानगनको जोडीसँग २२–२० र २१–१६ को सेटमा पराजित भए ।