काठमाडौं (हाम्रो खेलकुद) – १३औं साग र प्रथम एभीसी एसियन सेन्ट्रल जोन मसहला भलिबल च्याम्पियनसिपको लागि प्रशिक्षण र केही अभ्यास खेलका लागि थाइल्यान्डमा रहेको नेपाली राष्ट्रिय महिला भलिबल टोलीले आज पहिलो अभ्यास खेल खेल्दैछ ।
नेपाली टोलीले आज थाइल्यान्डको बैंकक युनिभर्सिटीसँग पहिलो अभ्यास खेल खेल्न लागेको हो । खेल बैंककस्थित एसियाकै उत्कृष्ट प्रशिक्षण केन्द्र एफआइभीवी डेबलपमेन्ट सेन्टरमा अपरान्ह ४ बजेपछि हुनेछ ।
अभ्यास र प्रशिक्षणका लागि २२ सदस्यीय नेपाली टोली गत बुधबार त्यसतर्फ प्रस्थान गरेको थियो । टोलीले दैनिक दुई समयमा (बिहान र साँझ) प्रशिक्षण गरिरहेको छ ।
त्यहाँको प्रशिक्षण र अभ्यास खेलपछि नेपाली टोली सेन्ट्रल जोनका लागि बंगलादेश प्रस्थान गर्नेछन् । सेन्ट्रल जोन ढाकामा २२ कात्तिकदेखि २७ सम्म आयोजना हुदैछ । त्यसपछि नेपाली टोली १३औं सागको तयारीमा जुट्नेछ । १३औं साग १५ देखि २४ मंसिरसम्म काठमाडौं र पोखरामा आयोजना हुदैछ ।
