काठमाडौं (हाम्रो खेलकुद) – गत महिना १३ औं दक्षिण एसियाली खेलकुद (साग) का दौरान राष्ट्रिय महिला क्रिकेट टोलीकी स्पिनर अन्जली चन्दले विश्व क्रिकेटमा नयाँ कीर्तिमान रचिन् । जुन अब कुनैपनि बलरलाई तोडिन असम्भव जस्तै देखिन्छ ।

१३ औं दक्षिण एसियाली खेलकुद (साग) महिला क्रिकेटमा माल्दिभ्सविरुद्ध पोखरामा ह्याट्रिक सहित २.१ ओभरमा कुनै रन नदिइ ६ विकेट लिएकी थिइन् । जुन टि ट्वान्टीमा महिला र पुरुष दुबैको सर्वोत्कृष्ट प्रर्दशन हो । उनको यस कीर्तिमानले नेपालमा मात्र होइन अन्तर्राष्ट्रिय जगतमा पनि चर्चा बटुल्यो । अन्जलीलाई सामाजिक सञ्जालमा बधाइको ओहिरो नै लाग्यो ।

पुरुष टोलीले सन् १९९६ र महिला टोलीले सन् २००७ देखी अन्तराष्ट्रिय स्तरमा प्रतिस्पर्धा गर्न थालेका हुन् । सिमित स्रोत र साधनका बीच खेलाडीको दिनरातको अथक मिहिनेतको कारण नेपाल ओडीआई स्तर सम्म आई पुगेको छ । यस अवधीमा अन्तर्राष्ट्रिय स्तरमा खेलाडी र टोलीको नाममा गरि नेपालबाट ९ विश्व कीतिमान बनेको छन् । जुन यस प्रकार छन् ।

९. २ बलमा जित

सुन्दा सबैलाई आश्चर्य लाग्न सक्छ । ५० ओभरको खेल, ११ रनको लक्ष्य अनि २ बलमै विजयी । सन् २००६ मा म्यानमारविरुद्ध नेपालले यस कीर्तिमान कायम गरेको थियो । टस जितेर फिल्डिङ गर्ने निर्णय लिएको नेपालले महबुब आलम ७ र बिनोद दासले ३ विकेट लिएपछि म्यानमार १२.१ ओभरमा १० रनमा अल आउट भएको थियो । ११ रनको लक्ष्य नेपालले दुई बलमा पुरा गर्दै कीर्तिमान कायम गरेको थियो । ५ रन एक्स्ट्रास्वरुप उपहार पाएपछि २ बलमै नेपालको जित सम्भव बनेको थियो । ओपनर महेश क्षेत्री र ज्ञानेन्द्र मल्लले समान १–१ बलमा ३–३ रनमा नटआउट रहेका थिए ।

महबुब आलम (तस्बिर: एजेन्सी)

८. महबुवको एकै खेलमा १० विकेट

सन् २००८ मा जर्सिमा डिभिजन ५ लिगमा मोजाम्बिकबीरुद्ध टस हारेर ब्याटिङ थालेको नेपालले निर्धारित ५० ओभरमा ७ विकेट गुमाउँदै २ सय ३८ रन बनाएको थियो । २ सय ३९ रनको विजयी लक्ष्य पक्ष्याएको मोजाम्बिक १४.५ ओभरमा अल आउट हुँदै १९ रनमा समेटियो । महबुबले ७.५ ओभरमा १ मेडन सहित १२ रन खर्चेर १० विकेट लिए । उनले त्यसबेला ५ ब्याटम्यान बोल्ड,४ एलबीडब्लू र १ क्याच आउटको सिकार बनाएका थिए । महबुब सिमित ओभरमा एकै खेलमा १० विकेट लिने पहिलो खेलाडी बने र गिनिज बुकमा नाम लेखाएका थिए ।

मोजाम्बिकका दुई ब्याट्सम्यानले मात्र खाता खोल्न सक्दा ९ खेलाडी डक आउट भएका थिए । पछिल्लो समय ढल्कँदो उमेरसँगै खस्किदो प्रर्दशनका कारण महबुब सन्न्यासको संघारमा छन् । महबुब सन् २०१७ मा काठमाडौंमा केन्यासँग दुई खेल यता सिनियर टोलीमा छैनन् । पछिल्लो समय घरेलु लिगमा पनि महबुबको प्रर्दशन कमजोर छ । यो रेकर्डले महबुवलाई विश्व क्रिकेट जगत र नेपालले सधैँभरी सम्झिरहने छ ।

७. सोमपालको १० औं नम्बरमा ४० रन

सन् २०१४ मा नेपाल र हङकङबीच टी–२० सिरिज श्रीलंकामा चलिरहेको थियो । चौथो खेलमा हङकङबीरुद्ध टस हारेर ब्याटिङ थालेको नेपाल १२.५ ओभरमा नेपाल २५–८ को कमजोर अवस्थामा पुगेको थियो । जुन अवस्थामा नेपालले ५० रन पनि कटाउन नसक्ने अनुमान समर्थकहरुको थियो । वसन्त आउट भएसँगै शक्ति गौचन,सोमपाल कामी र अमृत भट्टराईको विकेट हातमा थियो । तीनै जना बलर थिए ।

त्यस वर्षदेखि नै राष्ट्रिय टिममा देखा परेका सोमपाल कामीले उक्त खेलमा चमत्कारपूर्ण ब्याटिङ गरे । सोमपाल क्रिजमा आउनु अघि शक्ति १० बलको सामना गर्दा खाता खोल्न सकेका थिएनन् । सोमपालले शक्तिसँग मिलेर १८।५ बल सम्म ४३ रनको साझेदारी गर्दै स्कोर ६८.८ को अवस्थामा पुर्याए । जुन स्कोर कोलोम्बोको पिचमा प्रतिस्पर्धात्मक मानिन्थ्यो। सोमपालले ३१ बलमा ६ चौका र २ छक्का प्रहार गर्दै ४० रन बनाएको अवस्थामा १९ औं ओभरको अन्तिम बलमा आउट हुन पुगे ।

आउट भएपनि सोमपालले आफ्नो नाममा विश्व रेकर्ड कायम गरे। अहिलेसम्म टी–२० क्रिकेटमा १० औं नम्बरमा आएर ४० रन बनाउने सोमपाल कामी एक्लो ब्याट्सम्यान हुन् । उक्त खेलमा भने हङकङ २ विकेटले विजयी भएको थियो।

५.रुविनाको एकै ओभरमा ५ विकेट

सन् २००९ मा मलेसियामा एसीसी महिला टी–२० च्याम्पियनसिप अन्तर्गत नेपालले सिंगापुरविरुद्ध टस जितेर पहिला ब्याटिङ गर्दै ९ विकेटको क्षतिमा ७९ रन बनाएको थियो । जवाफी ८० रनको लक्ष्य पक्ष्याएको सिंगापुरको नाटकीय विकेट पतन भयो । कप्तान रुविना क्षेत्रीले मलेसियाको पिचमा कमालको प्रदर्शन गरिन् ।

रुविनाले अन्तिम ओभरमा लगातार पाँच विकेट लिएपछि हारको मुखमा पुगेको नेपालले खेल बराबरीमा रोक्न सफल भएको थियो। रुविनाले दोस्रो, तेस्रो,चौथो,पाँचौ र अन्तिम बलमा लगातार विकेट लिएकी थिइन् । उक्त प्रदर्शनसँगै रुविना पहिलो पटक ह्याट्रिक गर्ने नेपाली महिला खेलाडी समेत बनिन् । साथै महिला टी–२० क्रिकेटमा एकै ओभरमा लगातार ५ विकेट लिने पहिलो महिला क्रिकेटरको रेकर्ड समेत आफ्नो नाममा लेखाइन् ।

५. टी–२० विश्वकपमा नो वाइड

नेपाली क्रिकेट जगतमा सबैभन्दा ठूलो सफलता सन् २०१४ मा बंगलादेशमा सम्पन्न टी–२० विश्वकपलाई लिइन्छ । नेपाली टोलीको बलिङ पक्ष सधैं बलियो हतियारको हुँदै आएको छ । विश्वकपमा पनि नेपालीले बलरले त्यसलाई प्रमाणित गरेका थिए । पहिलो खेलमा हङकङलाई ८० रनको फराकिलो अन्तरले हराउँदै विश्वकपमा नेपालले सानदार सुरुवात गरेको थियो ।

हङकङलाई ६९ रनमा अल आउट गर्दा कुनै वाइड फालेन । नेपाल दोस्रो खेलमा आयोजक बंगलादेशसँग ८ विकेटले पराजित हुन पुग्यो । तर वाइडमा रन भने दिएन । अन्तिम खेलमा अफगानिस्तानलाई ९ रनले पराजित गर्दै विश्व क्रिकेट जगतमा पुन एक पटक तहल्का पिट्यो । उक्त खेललमा पनि वाइडको रुपमा कुनै रन दिएन । जुन एउटा विश्व रेकर्ड बन्यो ।

४. ओडीआईमा रोहितको अर्ध शतक

युवा खेलाडी रोहित कुमार पौडेल ओडीआईमा सर्वाधिक कम उमेरमा अर्ध शतक पुरा गर्ने विश्वका कान्छा खेलाडी हुन् । रोहितले गत माघमा यूएईसँगको तीन ओडीआई सिरिज अन्तर्गत दोस्रो खेलमा ५८ बलमा ७ चौका सहित ५५ रन जोड्दै यस कीर्तिमान कायम गरेका थिए । जुन बेला रोहित १६ वर्ष १ सय ४६ दिनका थिए । त्यसअघि सर्वाधिक सानो उमेरमा अर्ध शतक पुरा गर्ने रेकर्ड पाकिस्तानका पुर्व कप्तान शाहिद अफ्रिदी र भारतका सचिन तेन्दुलकर नाममा थियो ।

३. सन्दीपको टी२० आईमा अर्धशतक

युवा हिटर सन्दीप जोराको टि२० आईमा अर्ध शतक प्रहार गर्ने विश्वका कान्छा खेलाडी हुन् । जोराले गत माघमा यूएईसँगको तीन टि२० सिरिज अन्तर्गत पहिलो खेलमा ५३ रन जोड्दै यो कीर्तिमान कायम गरेका थिए । सन्दीपले १७ वर्ष १ सय ३ दिनको उमेरमा अर्धशतक बनाउँदै उक्त कीर्तिमान कायम गरेका हुन् । नेपाल २१ रनले पराजित भएको खेलमा सन्दीपले ४६ बलमा ३ चौका र १ छक्का सहित ५३ रनको योगदान दिए ।

२. टी२० मा पारसको शतक

नेपाली क्रिकेटका वान म्यान आर्मी अर्थात एकल योद्धा पारस खड्का टी ट्वान्टी आईमा लक्ष्य पछ्याउँदा शतक प्रहार गर्ने विश्वका पहिलो कप्तान हुन् । पारसले यस कीर्तिमान दुई महिना अघि जिम्वावे र सिंगापुरसँगको त्रिकोणात्मक सिरिजमा कायम गरेका थिए । पारसले सिंगापुरले प्रस्तुत गरेको १ सय ५२ रनको लक्ष्य पछ्याउने क्रममा ५२ बलमा ९ छक्का र ७ चौका सहित १ सय ६ रनमा अविजित रहँदै यस कीर्तिमान हासिल गरेका थिए ।

१.अन्जलीको ६ विकेट

अन्जलीले १३ औं सागमा माल्दिभ्सविरुद्ध अविश्वसनिय कीर्तिमान कायम गरिन् । ४ वर्षपछि सिनियर टोलीमा पुनरागमन गरेकी अन्जलीले टि ट्वान्टी आईको डेब्यू खेलमै माल्दिभ्सविरुद्ध २ ओभरमा कुनै रन नदिइ ६ विकेट लिएपछि माल्दिभ्स १०.१ ओभरमा १६ रनमा अल आउट भएको थियो । अन्जलीले ४ ब्याट्सवुमेनलाई क्याच र २ लाई बोल्ड आउट गरिन् । अन्जलीले नवौं ओभरको पाँचौ र छैटौं तथा ११ औं ओभरको पहिलो बलमा विकेट लिदै ह्याट्रिक पुरा गरेकी थिइन् । जुन प्रर्दशन टि ट्वान्टी आइकै सर्वोउत्कृष्ट हो ।

यसअघि महिला टि ट्वान्टी आईमा मालीकी मास एलिसाले ४ ओभरमा १ मेडन सहित ३ रन खर्चेर चीन विरुद्ध ६ विकेट लिएकी थिइन् । जुन कीर्तिमान रहँदै आएको थियो । पुरुष टि ट्वान्टी आईमा भारतका युवा तीब्र गतिका बलर दिपक चाहरले अघिल्लो महिना बंगलादेशविरुद्ध ह्याट्रिक सहित ३.२ ओभरमा ७ रन खर्चेर ६ विकेट लिएका थिए । जुन पुरुषमा टि ट्वान्टीमा कीर्तिमान रहेको छ ।