काठमाडौं (हाम्रो खेलकुद) – कतार एयरवेज सहिद स्मारक ‘ए’ डिभिजन लिगमा आज (बुधबार) चौथो चरणको खेल अन्तरगतको अन्तिम दिन एक मात्रै हुँदैछ ।

सातदोबाटोस्थित एन्फा कम्प्लेक्समा बिहीबार विभागीय नेपाल एपीएफ क्लब र सरस्वती युथ क्लबबीच दिउँसो ३ बजेपछि खेल हुनेछ । लिगमा जित निकाल्न नसकेको दुवै टोली पहिलो जितको लक्ष्यसहित मैदानमा उत्रनेछन् ।

लिगको तेस्रो चरणको खेल सकिदा एपीएफले २ हार र एक बराबरीको नतिजा निकालेको छ । मनाङसँग २–० ले तथा रुस्लान थ्री स्टारसँग १–० ले पराजित भएको एपीएफले यति हिमालयन शेर्पा क्लबसँग १–१ गोलको बराबरी खेल्दै लिगमा पहिलो अंक जोड्न सफल भएको थियो ।

यता, सरस्वतीले भने लिगमा अंकको खाता खोल्न सकेको छैन । कुनै गोल गर्न सकेको छैन । सरस्वती पहिलो खेलमा एनआरटीसँग ४–० ले, जावलाखेलसँग १–० ले र पुलिससँग २–० ले पराजित भएको थियो । एपीएफ १२औं तथा सरस्वती पुछारमा छ । फ्रेन्ड्स १३औं स्थानमा छ । खराब प्रदर्शन गर्दै जितविहीन रहेको यी दुई टोलीलाई लिगमा पहिलो जित निकाल्ने अवसर रहेको छ ।

युवा खेलाडीले भरिएको एपीएफसँग आशिष लामा, नवीन लामा, प्रविन स्याङ्तान, रमेश दंगालजस्ता खेलाडीहरुको साथ छ । उनीहरुले जुनसुकै बेला पनि नतिजा उल्ट्याउन सक्छन् । यता, औसतको टोली सरस्वती एपीएफलाई हराउने दाउमा हुनेछ ।