नेपालगन्ज (हाम्रो खेलकुद) – सातौ संस्करणको प्रधानमन्त्री कप महिला राष्ट्रिय भलिबल प्रतियोगिताको तेस्रो दिन आज दुई खेलमा प्रतिस्पर्धा हुदैछ ।

पहिलो खेलमा नेपाल एपिएफ क्लब र लुम्बिनी युनाइटेड टिम तथा दोस्रो खेलमा होङ्गान्जी न्यु डायमन्ड स्पोर्ट्स क्लब र त्रिभुवन आर्मी क्लबबीच प्रतिस्पर्धा हुदैछ ।

डायमन्ड र आर्मीबीचको खेल नेपालगन्जस्थित रंगशालाको कभर्डहलमा दिउँसो ३ बजेपछि हुनेछ । उपाधि यात्रालाई जीवितै राख्न दुवै टोलीलाई जितको खाँचो छ । आर्मीको दुई खेलबाट ३ तथा डायमन्डको एक खेलबाट १ अंक छ ।

डायमन्ड पहिलो खेलमा पुलिससँग भोगेको हारको गल्तीलाई सच्याउदै कोर्टमा उत्रनेछ । डायमन्ड पहिलो खेलमा गतवर्षको विजेता नेपाल पुलिस क्लबसँग ३–२ को सेटमा पराजित भएको थियो । टोलीसँग प्रतिभा माली, अरुणा शाही, ललितानाथ, सलिना श्रेष्ठ, पनामिका राई, झरना श्रेष्ठ, बालमिका आचार्य, रिया कुँवर, रिमा कुँवर, एन्जिला प्रधान, प्रगति नाथ र प्रतिक्षा गुरुङको साथ रहेको छ ।

यता, आर्मी पनि डायमन्डलाई हराउने लक्ष्यमा हुनेछ । आर्मीले पहिलो खेलमा लुम्बिनी युनाइटेडलाई ३–० को सोझो सेटमा पराजित गर्दा दोस्रो खेलमा नेपाल एपिएफ क्लबसँग ३–१ को सेटमा पराजित भएको थियो ।

टोलीसँग कृपा अधिकारी, साफिया पुन, सुनिता खड्का, शान्ति थारु, संगम महतो, जानकी भण्डारी, सरस्वती खतिवडालगायतको खेलाडीको सात रहेको छ ।

दिनको पहिलो खेलमा स्थानिय टोली लुम्बिनी युनाइटेड टिमले बलियो नेपाल एपिएफ क्लबसँग दिउँसो १ बजे प्रतिस्पर्धा गर्दैछ । एपिएफ लुम्बिनीलाई हराउदै लगातार दोस्रो जित निकाल्दै उपाधि सम्भावनालाई बलियो बनाउने लक्ष्यमा हुनेछ ।

टोलीसँग सरस्वती चौधरी, रेश्मा भण्डारी, निरुता ठगुन्ना, उषा विष्ट, हीरा केसी, कविता भट्ट, बिनिता बुढाथोकी, पुजा चौधरी, नेविका चौधरी र मनिषा तामाङको साथ रहेको छ ।

एपिएफले पहिलो खेलमा त्रिभुवन आर्मी क्लबमाथि ३–१ को जित निकालेको थियो । लुम्बिनीले एक खेलमा पनि जित निकाल्न सकेको छैन । पहिलो खेलमा आर्मीसँग पराजित भएको लुम्बिनी दोस्रो खेलमा नेपाल पुलिस क्लबसँग पराजित भएको थियो ।

लुम्बिनी बलियो एपिएफलाई चुनौती दिदै बढी भन्दा बढी अंक जोड्ने लक्ष्यमा हुनेछ । शीर्षस्थानमा रहेको पुलिसको ५ अंक छ । एपिएफ र आर्मीको समान ३ अंक छ । लुम्बिनीले अंकको खाता खोल्न सकेको छैन ।

बाँके जिल्ला भलिबल संघको आयोजनामा जारी लिगमा तीन विभागिय टोली नेपाल पुलिस क्लब, नेपाल एपिएफ क्लब, त्रिभुवन आर्मी क्लब, होङ्गान्जी न्यु डायमण्ड स्पोर्ट्स क्लब र स्थानिय टोली लुम्बिनी युनाइटेड गरी ५ टोलीको सहभागिता रहेको छ ।

लिगपछि बढी अंक जोड्ने टोलीले उपाधि जित्नेछ । लिगको विजेताले उपाधिसहित ५ लाख रुपैयाँ प्राप्त गर्नेछ । त्यस्तै दोस्रो टोलीलाई २ लाख, तेस्रोलाई १ लाख र चौथो हुने टोलीले ५० हजार रुपैयाँ प्राप्त गर्नेछ ।