नेपालगन्ज (हाम्रो खेलकुद) – दुई विभागीय टोली नेपाल एपिएफ क्लब र नेपाल पुलिस क्लब सातौं संस्करणको प्रधानमन्त्री कप महिला भलिबल प्रतियोगिताको उपाधिका लागि आज (मंगलबार) भिड्दैछन् ।

सोमबार नेपालगन्जस्थित रंगशाला परिसरमा रहेको कभर्डहलमा भएको आ–आफ्नो खेलमा सफलता हात पारेपछि यि दुई टोलीबीच उपाधि भिडन्त तय भएको हो । जारी प्रतियोगितामा पुलिस र एपिएफ अपराजित छ । पुलिस र एपिएफबीचको खेल दिउँसो २ बजेपछि हुनेछ ।

यस खेलमा सोझो सेटमा जित हात पार्ने टोली च्याम्पियन बन्नेछ । एपिएफले ३–२ को सेटमा जित निकालेमा अंकको आधारमा च्याम्पियन बन्नेछ । पुलिसले ३–२ को सेटमा जित निकालेको अवस्थामा अंक १० बराबरी हुनेछ । जितको आधारमा पुलिस च्याम्पियन बन्नेछ ।

अपराजित रहेको एपएिफको ९ तथा साविक विजेता समेत रहेको पुलिसको ८ अंक छ । पुलिसले डायमन्डसँग १ अंक गुमाएको थियो ।

पछिल्लो दुई उपाधि पुलिसले जित्दा दुवैमा एपिएफलाई पराजित गरेको थियो । गतवर्ष प्रधानमन्त्री कपकै फाइनलमा हराएको पुलिसले कोभिडपछि यसै महिना पोखरामा आयोजना भएको टाइगर कप आमन्त्रण महिला तथा पुरुष भलिबल च्याम्पियनसिपको फाइनल पनि जितेको थियो ।

त्यसअघि दिउँसो १ बजे होङ्गान्जी न्यु डायमन्ड स्पोर्ट्स क्लबले आफ्नो अन्तिम खेलमा स्थानिय टोली लुम्बिनी युनाइटेडसँग प्रतिस्पर्धा गर्दैछ । प्रतियोगितामा ३ खेलबाट ४ अंक जोडेको डायमन्ड तेस्रो भइकेको छ । आर्मी चौथो तथा अंकविहीन लुम्बिनी पुछारमा छ ।

सोमबार लिगको तेस्रो खेलमा एपिएफले पहिलो सेट गुमाएपनि त्यसपछिको तीन सेट आफ्नो पक्षमा पार्दै न्यु डायमन्डमाथि ३–१ को सेटमा जित निकालेको थियो । अर्काे खेलमा पुलिसले पनि आर्मीसँग पहिलो सेट गुमाएपनि त्यसपछिको तीन सेट आफ्नो पक्षमा पार्दै उपाधि सम्भावना जीवितै राखेको थियो ।

बाँके जिल्ला भलिबल संघको आयोजनामा जारी प्रतियोगितामा तीन विभागिय टोली नेपाल पुलिस क्लब, नेपाल एपिएफ क्लब, त्रिभुवन आर्मी क्लब, होङ्गान्जी न्यु डायमण्ड स्पोर्ट्स क्लब र स्थानिय टोली लुम्बिनी युनाइटेड गरी ५ टोलीको सहभागिता रहेको छ ।

लिगको विजेताले उपाधिसहित ५ लाख रुपैयाँ प्राप्त गर्नेछ । त्यस्तै दोस्रो टोलीले २ लाख, तेस्रोले १ लाख र चौथो हुने टोलीले ५० हजार रुपैयाँ प्राप्त गर्नेछ ।