काठमाडौं (हाम्रो खेलकुद) – अशिम युवा क्लबको आयोजनामा बुधबारदेखि शुरु हुने प्रथम साराङ्गे छाहारी भलिबल कप पुरुष भलिबल प्रतियोगितामा विभिन्न २० टोलीको सहभागिता रहने भएको छ ।

क्लबका अध्यक्ष लोक बिक्रम मल्लले प्रतियोगिताको सम्पुर्ण तयारी पुरा भएको र प्रतियोगितामा २० टोलीको सहभागिता रहेको जानकारी गराए । प्रतियोगिता नयाँ बसपार्कस्थित ढोरपाटन स्पोर्ट्स क्लबको खेल मैदानमा ३ देखि ७ चैतसम्म आयोजना हुदैछ । प्रतियोगितामा विभाग तथा प्रदेशको प्रतिनिधित्व गरिसकेका खेलाडीले खेल्न पाउनेछैन ।

सहभागी २० टोलीलाई चार समूहमा विभाजन गरिएको छ । हरेक समूहका शीर्ष दुई टोलीले क्वाटरफाइनलमा स्थानमा बनाउनेछ । सेमिफाइनल सम्मका खेलहरु बेस्ट अफ थ्रीको आधारमा तथा फाइनल र तेस्रो स्थानको खेल बेस्ट अफ फाइभकै आधारमा हुने एसियन भलिबल रेफ्री क्यान्डिडेट तथा प्रतियोगिताको रेफ्री संयोजक बिकास गुरुङले जानकारी गराए ।

समूह ‘ए’ मा आयोजक रातो, गैरी गाँउ युवा समूह, नौ कुण्ड रसुवा, पञ्चकन्या नुवाकोट र चन्द्रसुर्य ब्लक उद्योग रहेका छन् । समूह ‘बी’ मा स्प्रिङडेल भक्तपुर, राष्ट्रिय लोक दोहोरी प्रतिष्ठान, वर्डिगार्ड गाउपालिका पर्वत, न्युटन स्कुल र आयोजक निलो रहेका छन् ।

समूह ‘सी’ मा राइजिङ युवा क्लब, त्रिभुवन अन्तर्राष्ट्रिय बिमानस्थल (टीआईए), गल्कोट बाग्लुङ, आर आर कलेज र आरजी ग्रुप रहेका छन् । समूह ‘डी’ मा गल्याङ स्याङ्जा, मणिमुकुन्द भलिबल क्लब रुपन्देही, दि गोर्खा युनाइटेड, ढोरपाटन क्लब र कागेश्वी नगरपालिका रहेका छन् ।

प्रतियोगिताको विजेताले १ लाख १ हजार १ सय ११ रुपैयाँ प्राप्त गर्नेछन् । दोस्रो हुनेले ६१ हजार १ सय ११ तथा तेस्रो हुने टोलीले ३१ हजार १ सय ११ रुपैयाँ हात पार्नेछन् । प्रतियोगिताको उत्कृष्ट खेलाडीले ५ हजार तथा उत्कृष्ट प्रशिक्षकले ३ हजार रुपैयाँ प्राप्त गर्ने आयोजकले जनाएको छ । व्यक्तिगत विधा डिफेन्डर, ब्लकर, स्पाइकर, क्विकर, सर्भर, सेटर र उदियमान खेलाडीले समान २ हजार ५ सय हात पार्नेछन् ।