काठमाडौं (हाम्रो खेलकुद) – देबे हाते युवा ब्याट्सम्यान कुशल मल्लले टि२० आई क्रिकेटमा सर्वाधिक कम उमेरमा अर्धशतक प्रहार गर्ने विश्व कीर्तिमान बनाएका छन् । त्रिकोणात्मक टि२० आई सिरिजको फाइनलमा नेदरल्यान्ड्सविरुद्ध कुशलले २४ बलमा ५ छक्का र २ चौका सहित ५० रनमा अविजित थिए ।

उक्त अर्धशतक कुशलले १७ वर्ष ५० दिनको उमेरमा पूरा गरेका थिए । जुन टि२० आईमा सबैभन्दा कम उमेरमा बनेको अर्धशतक हो ।यसअघि उक्त विश्व कीर्तिमान युगान्डाका ब्याट्सम्यान फ्रान्क अक्कांवासाले कतारविरुद्ध १७ वर्ष ५२ दिनमा ६६ रनको इनिङ खेलेका थिए । कुशलले उक्त कीर्तिमान २ दिनले अघि तोडेका हुन् । युगान्डाका ब्याट्सम्यान फ्रान्कअघि सन्दीप जोराले २०१९ मा जनवरीमा यूएईविरुद्ध टि२० आईमा डेब्यू गर्दै ५३ रन बनाएका थिए । उक्त समय सन्दीप जोरा १७ वर्ष १ सय ३ दिनका थिए ।

कुशलले गतवर्ष आइसिसी विश्वकप लिग–२ अन्तर्गत त्रिकोणात्मक सिरिजमा अमेरिकासँग डेब्यू गर्दै ५५ रन बनाउँदै विश्व कीर्तिमान बनाएका थिए । कुशलले उक्त समय १५ वर्ष ३ सय ४० दिनमा ५१ रन बनाएका थिए । त्यसअघि रोहित कुमार पौडेलले २०१९ मा यूएईविरुद्ध १६ वर्ष १ सय ४६ दिनमा ५५ रनको इनिङ खेलेका थिए ।

कुशलको ५०, दीपेन्द्रको ४८ र कुशल भुर्तेलको ७७ रनको सहयोगमा नेपालले आफ्नो टि२० क्रिकेटकै सर्वाधिक योगफल २ सय ३८ रन बनाएको थियो । नेदरल्यान्ड्सलाई ९६ रनमा अल आउट गर्दै नेपालले १ सय ४२ रनको कीर्तिमानी रन अन्तरले हराएको थियो । जुन नेपालले टि२० आईमा जितेको सर्वाधिक फराकिलो अन्तरको जित हो ।