काठमाडौं (हाम्रो खेलकुद) – व्यवसायिक भलिबल खेल्न माल्दिभ्स पुगेका नेपाली महिला राष्ट्रिय टोलीकी उपकप्तान मञ्जु गुरुङ र राष्ट्रिय टोलीकै सदस्य अरुणा शाही शनिबार त्यहाँ पुगेर टोलीसँगको अभ्यासमा जुटेका छन् ।
घरेलु प्रतियोगितामा पश्चिमाञ्चलबाट खेल्दै आएका मञ्जुले अरुणाले माल्दिभ्सको फेयस्दा क्लबबाट त्यहाँको क्लब लिग च्याम्पियनसिपमा सहभागिता जनाउनेछन् । उनीहरु दुवै पहिलो पटक पहिलो पटक विदेशी क्लबमा आबद्ध भएका हुन् । माल्दिभ्स क्लबमा दुई विदेशी खेलाडी राख्न पाउने प्रावधान अनुसार उनीहरु आबद्ध भएका हुन् ।

क्लबका अन्य खेलाडीसँग मञ्जु गुरुङ र अरुणा शाही । फोटो- मञ्जुको फेसबुकबाट ।

राष्ट्रिय टोलीकी स्पाइकर प्रतिभा माली र कोपिला उप्रेती पनि माल्दिभ्स क्लब मिस्कियमागु इजी बाट खेलिरहेका छन् । उनीहरुको टोलीले शुक्रबार पहिलो खेलमा सफलता हासिल गरेको थियो । फेयस्दा र मिस्कियमागु दुवैले सोमबार अलग अलग खेलमा प्रतिस्पर्धा गर्दैछन् । मञ्जु र अरुणा सम्मिलित टोलीले माल्दिभ्यन आरसीसँग प्रतिस्पर्धा गर्नेछ । त्यो टोलीलाई प्रतिभा र कोपिलाको टोलीले पहिलो खेलमा हराएको थियो । कोपिला र प्रतिभाको टोलीले भने सोमबार सि पोलस्टारको सामना गर्नेछ ।
पहिलो पटक विदेशी क्लबबाट खेल्दा केही नौलो र केही रमाइलो भइरहेको मञ्जुले बताइन् । उनले भनिन्,‘अरु क्लबमा विदेशी खेलाडी पनि छन् । हाम्रोमा अलि जुनियर खेलाडी छन् । तर पनि हामी राम्रो गर्ने प्रयास गर्नेछौं ।’ क्लबसँग एक हजार अमेरिकी डलर लिने सम्झौता भएको पनि मञ्जुले बताइन् । माल्दिभ्सको राष्ट्रिय महिला भलिबल लिगमा ५ क्लबको सहभागिता रहेको छ । सँगसँगै सञ्चालन भइरहेको पुरुष लिगमा भने ६ टोली छन् ।