काठमाडौं (हाम्रो खेलकुद)– अन्तर्राष्ट्रिय ओलम्पिक परिषद् (आइओसी) ओलम्पिक सोलिडारिटी कोर्षअन्तर्गत साइक्लिङ प्रशिक्षकहरुका टेक्निकल कोर्ष सुरु भएको छ । युसिआइका विज्ञ डेविडले कोर्षमा एक सयम सैद्धान्तिक र एक समय व्यवहारिक ज्ञान दिनेछन् । नेपालमा साइक्लिङ खेलको प्रचुर सम्भावना रहेकाले कोर्षले महत्वपूर्ण भूमिका खेल्ने उनले बताए । कोर्षमा विभिन्न जिल्ला, एपिएफ, आर्मीलगायतका २२ प्रशिक्षकले प्रशिक्षणमा भाग लिएका छन् ।
सात दिने कोर्षको नेपाल ओलम्पिक कमिटी (एनओसी) का अध्यक्ष जीवनराम श्रेष्ठले उद्घाटन गरे । चार बर्षभित्र विभिन्न खेलका स्तर उन्नतीका लागि प्राविधिक ज्ञान प्रदान गर्ने उद्देश्यले यो कोर्ष सञ्चालन हुदै आएको श्रेष्ठले बताए । ‘हामीले संघको गतिविधि, सम्भावना बोकेको खेललाई हेरेर सोलिडारिटी कोर्षको सिफारिस गर्दछौं । जसको आधारमा आइओसीले सोलिडारिटीका लागि सहयोग गर्दछ,’ श्रेष्ठले भने,‘सक्रिय र व्यवस्थित भएका संघका आधारमा एनओसीले यस्ता सिफारिस गर्दै आएको छ ।
श्रेष्ठले नेपाल माउन्टेन वाइकका लागि निकै उपयुक्त रहेको बताउँदै यसबाट एसियन र ओलम्पिकमा समेत पदक जित्न सकिने बताए । ‘नेपालको भुवनोटभित्र यसको विकास गर्न सकिन्छ’ , उनले भने,‘’ अन्य देशमा क्रितिम पहाड बनाएर खेलाउनुपर्ने अवस्था छ । त्यसैले यसको सम्भावना बढी देखिन्छ ।
नेपाल साइक्लिङ संघका अध्यक्ष छिमि उर्केन गुरुङले सन् २०१० पछि नेपालले साइक्लिङ प्रशिक्षकका लागि कोर्ष गर्न लागेको बताए । ‘अब हामी प्रशिक्षक, खेलाडी, जिल्लाहरुलाई उनीहरुको स्तरका आधारमा कार्ड वितरण गर्छौ । जसले हाम्रो स्तर माथि उठाउन मद्दत गर्ने छ,’ गुरुङले भने,‘व्यवसायीक साइक्लिङ खेलाडी र एमेच्योर खेलाडीहरुलाइ समेत कार्ड दिने व्यवस्था गर्दै यसप्रति व्यापक सहभागीता गराउने लक्ष्य छ ।’
