हेटौंडा (हाम्रो खेलकुद) – सुमन भोम्जन स्मृति खेलकुद प्रतिष्ठानले अर्को महिना आयोजना गर्ने व्यापार महोत्सवसँगै विभिन्न खेल सम्मिलित राष्ट्रिय खेलकुद पनि आयोजना गर्ने भएको छ ।
हेटौंडामा आइतबार पत्रकार सम्मेलन गर्दै आयोजकले खेलकुदतर्फ म्याराथन, तेक्वान्दो, कबड्डीको राष्ट्रिय प्रतियोगिता सञ्चालन गरिने जानकारी दिए । त्यस्तै सशस्त्र प्रहरीको एपिएफ क्लब र ढोरपाटन क्लबबीच मैत्रीपूर्ण भलिबल खेल सञ्चालन हुनेछ । त्यस्तै जिल्ला स्तरको शारीरिक सुगठनको प्रदर्शनी ग।िरने बताइएको छ ।
गतवर्षबाट सुरु भएको हेटौंडा गोल्डकप अन्तर्राष्ट्रिय फुटबललाई निरन्तरता दिन र यस क्षेत्रको खेलकुद एवम् पत्रकारिता क्षेत्रको विकासको निम्ति २ गतेबाट १३ गतेसम्म हेटौंडा–१० स्थित भुटनदेवी पार्क प्रतिष्ठानले औद्योगिक शान्ति नेपाल संस्था संगको सहकार्यमा राष्ट्रिय खेलकुद तथा व्यापार महोत्सव आयोजना गर्न लागेको हो । करिब २ लाख ५० हजार जनाले अवलोकन गर्ने र करिब १० करोड बराबरको कारोबार हुने लक्ष्य राखिएको प्रचारप्रसार समिति संयोजक गणेशदर्पण अधिकारीले जानकारी दिए ।
गत बर्षको विनाकारी भूकम्पमा परि हेटौडाका खेलकुद पत्रकार सुमन भोम्जनको मृत्यु भएको थियो । उनकै नाममा प्रतिष्ठान स्थापना गरि गत बर्ष हेटौडा गोल्डकप आयोजना गरिएको थियो ।
