काठमाडौं (हाम्रो खेलकुद) – नेपाली महिला राष्ट्रिय भलिबल टोलीको बन्द प्रशिक्षणमा पर्न सफल होङ्गान्जी न्यु डायमन्ड स्पोर्ट्स क्लबकी युवा उदियमान स्पाइकर रिया कुँवर शुक्रबार अस्पतालबाट डिस्चार्ज भएकी छन् ।

उनको गत सोमबार ट्रमा सेन्टरमा डाक्टर भद्र हमालको नेतृत्वमा रहेको टोलीले झन्डै दुई घन्टा लगाएर बायाँ घुँडाको एन्टेरिएर क्रुसिएट लिगामेन्ट (एसीएल) को सफल शल्यक्रिया भएको थियो ।

अस्पतालबाट डिस्चार्ज हुने क्रममा रियाले अहिले दुखाई महसुस नभएको र छिट्टै मैदानमा फर्कने बताइन् । ‘मलाई त अप्रेसन भए जस्तो नै लागेको छैन । दुखाई पनि छैन । अब निरन्तर फिजियोमा रहनेछु ।’ १५ वर्षीय रियाले भनिन्, ‘चोटबाट छिट्टै पूनरागमन गर्नेछु । पहिले भन्दा राम्रो खेल्ने प्रयास गर्नेछु ।’

रियाँको झन्डै एक महिनाअघि प्रशिक्षणका क्रममा बायाँ घुँडाको एन्टेरिएर क्रुसिएट लिगामेन्ट (एसीएल) च्यातिएपछि शल्यक्रिया नै गर्नुपरेको थियो । डाक्टर भद्र हमालले शल्यक्रिया राम्रो भएको र फिजियो विशेष ध्यान दिएमा ९ महिनाभित्रमा आफ्नो पुरानो खेलमा फर्कन सक्ने बताएका छन् ।

सोमबार शल्यक्रिया भएपछि रियाले ट्रमा सेन्टरकै फिजियो थेरापिस्ट निकेश डाँगीसँग फिजियो गराइरहेकी थिइन् । अब उनको नियमित फिजियो निकेशसँग नै हुनेछ ।

सामाजिक सेवा इकाई प्रमुख तथा ट्रमा सेन्टरका सुचना अधिकारी अर्जुन प्रसाद भेटवालले उनको शल्यक्रिया राम्रो भएको र अब फिजियो पछि नै उनले कति समयमा कोर्टमा फर्कने त्यसमै भर पर्ने बताए । उनले ६ महिनापछि नै अभ्यासहरु गर्न सकिने र ९ महिनापछि व्यवसायिक खेल खेल्न सक्ने सम्भावना रहेको समेत थपे ।

राष्ट्रिय तथा अन्तर्राष्ट्रिय खेलाडीहरुको उपचारमा सहजीकरण गर्ने फोकल पर्सन राज कुमार पोखरेलले गर्दै आएको छ । उनकै पहलमा ब्याडमिन्टनकी सीतामाया राई पनि ट्रमामै शल्यक्रिया भएको थियो ।

शल्यक्रियासँगै उनी झन्डै ६ देखि ९ महिना मैदान बाहिर रहनेछिन् । यो सँगै रियाले घरेलु भलिबलमा आउदो १० असोजदेखि शुरु हुने छैटौं संस्करण एनभिए महिला तथा पुरुष क्लब च्याम्पियनसिपसँगै अन्य प्रतियोगिताहरु गुमाउनेछिन् ।

१० असोजदेखि सुरु हुने एनभिए क्लब च्याम्पियनसिपकै प्रशिक्षण दौरान न्यु डायमन्डको आफ्नै कोर्टमा रियाले स्पाइकका लागि जम्प गर्ने प्रयास गर्दा दुखाई महसुस गर्दै दुई साताअघि घुडाँमा सामान्य चोट बोक्न पुगेकी थिइन् । त्यसपछि उनलाई क्लबको मेडिकल पार्टनर अर्थाेप्लास्टमा लगिएको थियो । त्यहाँ फिजियोसँग केहि समय रिह्याब गरेपछि फिट भएपछि उनी पुन प्रशिक्षणमा फर्किएकी थिइन् । पुनः दुखाई महसुस गरेपछि राष्ट्रिय ट्रमा सेन्टरमा एमआरआई गरिएको थियो ।

एमआरआई परिक्षणमा उनको घुडाँको एसिएल (एन्टेरिएर क्रुसिएट लिगामेन्ट) च्यातिएको र शल्यक्रिया नै गर्नुपर्ने भएको हो । पछिल्लो समय रियालाई नेपाली भलिबलमा योगदान दिन सक्ने खेलाडीको रुपमा हेरिएको छ । १५ वर्षीय रियाले एसियन महिला भलिबल च्याम्पियनसिपको लागि नेपाल भलिबल संघले छनोट गरेको ३० सदस्यीय टोली हुदै १८ सदस्यीय टोलीमा स्थान बनाउन सफल भएकी थिइन् ।

नेपाल भलिबल संघले रियाको उपचारको लागि राष्ट्रिय खेलकुद परिषद (राखेप) सँग समन्वय गरेपछि ट्रमा सेन्टरमा उनको शल्यक्रियाको व्यवस्था भएको हो । राखेप र ट्रमा सेन्टरबीच खेलाडी तथा अन्यको उपचारको सहजताको लागि सम्झौता भएको थियो ।