स्याङ्जा (हाम्रो खेलकुद) – आयोजक वालिङ भलिबल क्लबसँगै स्याङ्जा भलिबल क्लब र दाजु भाई ट्रान्सपोर्ट सेवा प्रालि दोस्रो पुरुष तथा महिला भलिबल प्रतियोगिताको महिलातर्फको सेमिफाइनलमा प्रवेश गरेका छन् ।

स्याङ्जा वालिङस्थित मालेवगरको भलिबल कोर्टमा मंगलबार भएको खेलमा वालिङ भलिबल क्लबले शान्त भलिबल ट्रेनिङ सेन्टर पोखरालाई २५–१६, २५–१५ र २६–२४ को सेटमा हराउँदै अन्तिम चारमा स्थान बनाउन सफल भएको हो ।

यस्तै स्याङ्जा भलिबल क्लबले लाली गुराँस युवा क्लबलाई २५–१०, २५–१२ र २५–८ को सोझो सेटमा हराउँदै अन्तिम चारमा स्थान पक्का गर्दा दाजु भाई ट्रान्सपोर्ट सेवा प्रालिले प्रगतिग्राम युथ क्लबलाई २५–११, २५–१२ र २५–१० को सेटमा हराउँदै सेमिफाइनलमा पुग्न सफल भयो ।
यसअघि सोमबार भएको उद्घाटन खेलमा अकला फेन्सी स्टोर्सले आयोजक वालिङ ‘बी’ लाई पराजित गर्दै सेमिफाइनलमा स्थान बनाइसकेको छ ।

बुधबार सेमिफाइनलमा दाजु भाई ट्रान्सपोर्ट सेवा प्रालि र अकला फेन्सी स्टोर्स गल्याङ तथा स्याङ्जा भलिबल र वालिङ भलिबल क्लबबीच प्रतिस्पर्धा हुनेछ । पुरुषतर्फको खेलहरु बुधबारदेखि शुरु हुनेछ । वालिङ भलिबल क्लबले आफ्नो दोस्रो वार्षिकोत्सवको अवसर पारेर पुरुष तथा महिला भलिबल प्रतियोगिता आयोजना गर्न लागेको हो ।

प्रतियोगिता ८ देखि १३ कात्तिकसम्म वालिङ खेल मैदानमा हुने आयोजकले जनाएको छ । प्रतियोगितामा महिलातर्फ ८ टोली तथा पुरुषतर्फ १४ टोलीको सहभागिता रहेको छ ।

साविकको वडा स्तरीय प्रतियोगितामा सम्बन्धित वडाका ३ खेलाडी अनिवार्य हुनुपर्ने र बाँकी बाहिरका खेलाडी राख्न पाउने छन् । पुरुषतर्फको विजेताले १ लाख, दोस्रो हुनेले ५० हजार, तेस्रो हुनेले २५ हजार तथा सान्त्वना हुने टोलीले १० हजार प्राप्त गर्नेछन् । पुरुषतर्फको उत्कृष्ट खेलाडीले ५ हजार तथा व्यक्तिगत विधा (स्पाइकर, सेटर, ब्लकर, सर्भर तथा वेष्ट डिफेन्स) ले जनही २ हजार प्राप्त गर्नेछन् ।

यस्तै महिलातर्फको विजेताले २० हजार, दोस्रो हुनेले १० हजार तथा तेस्रो हुने टोलीले ५ हजार प्राप्त गर्नेछन् । महिलातर्फको उत्कृष्ट खेलाडीले २ हजार रुपैयाँ प्राप्त गर्नेछन् । प्रतियोगिताको मुख्य प्रायोजक वालिङ नगरपालिका र सह–प्रायोजक चापाकोट नगरपालिका रहेको छ । विषेश सहयोगीमा भिरकोट नगरपालिका र गल्याङ नगरपालिका रहेका छन् ।

वालिङ १० स्थयी घर भएका हाल बेलायत निवासी दौजित गुरुङ, छविराज गुरुङ र हेमन्त गुरुङले पुरुषतर्फको प्रथम पुरस्कार प्रायोजन गरेका छन् । दोस्रो पुरस्कार भारतीय सेनामा कार्यरत सुर्य बहादुर गुरुङ र बेलायत निवासी टिका गुरुङले प्रायोजन गरेका छन् ।

महिलातर्फको प्रथम पुरस्कार भुपेन लामिछानेले तथा दोस्रो पुस्कार वालिङकै हाल फ्रान्समा रहेका अंकित गुरुङ र समाजसेवी रामबच्छ निवासी विरेन्द्र श्रेष्ठले प्रायोजना गरेका छन् ।