ललितपुर (हाम्रो खेलकुद)– नेपाल पुलिस क्लबले दोस्रो कृष्णप्रसाद भट्टराई स्मृति राष्ट्रिय कराते प्रतियोगिताको महिला टिम कातामा स्वर्ण पदक जितेको छ ।

ललितपुर सातदोबाटोस्थित कराते एकेडेमीको हलमा बिहीबार सुरु भएको प्रतियोगिताको टिम काताको फाइनलमा त्रिभुवन आर्मी क्लबलाई हराउँदै पुलिसले स्वर्ण पदक जितेको हो । फाइनलमा पुलिसले २४.१६ अंक र आर्मीे २३.१६ अंक जोडेको थियो । एकलतर्फ स्वर्ण पदक जितेकी चन्चला दनुवारसहितको टोलीले टिम इभेन्टमा पहिलो स्थान प्राप्त गरेको थियो ।

एपिएएफ र बागामती प्रदेशले टिम कातामा कास्य पदक जितेका छन् । तेस्रो स्थानका लागि भएको प्रतिस्पर्धामा एपिएफ (२२.१४ अंक) ले गण्डकी (२०.८० अंक) प्रदेशलाई तथा बागमती (२३.२० अंक) ले लुम्बिनी प्रदेश (२१.२२ अंक) लाई हराएको थियो ।

आजै भएको पुरुष एकल र टिम इभेन्टमा एपिएफले स्वर्ण पदक जितेको थियो । एकलमा सोनिम मानन्धर र टिम इभेन्टमा सोनिमसहितको टोलीले पहिलो स्थान प्राप्त गरेको हो ।

गोदावारी नगरपालिकाद्धारा आयोजित कृष्ण प्रसाद भट्टराई खेल महोत्सव–२०७९ अन्तर्गत नेपाल कराते महासंघ जिल्ला प्रमुख डोजो ललितपुरले संचालन गरिरहेको राष्ट्रिय कराते प्रतियोगितामा १० टोलीको सहभागिता रहेको छ । माघ २८ गतेसम्म चलने प्रतियोगितामा १७ वटा इभेन्ट्समा प्रतिस्पर्धा हुनेछ । पहिलो दिन महिला र पुरुष एकल र टिम काता सम्पन्न भइसकेका छन् । आज कुमुतेका दुई प्रतिस्पर्धा हुनेछन् ।

पहिलो हुने प्रत्येक खेलाडीहरुलाई स्वर्ण पदक सहित स्पोर्टस ब्राण्डको गिफ्ट भौचर प्राप्त गर्नेछ र दोश्रो र तेश्रो हुनेहरुले पदक र प्रमाण पत्र प्राप्त गर्नेछन् । प्रतियोगिताका उत्कृष्ट १ महिला र १ पुरुष खेलाडीले नगद पुरस्कार सहित केल्मीको गिफ्ट हाम्पर प्राप्त गर्नेछन् । प्रतियोगिताको च्याम्पियन टोलीले ट्रफि सहित १ लाख र दोस्रो हुने टोलीले ५० हजार रुपैयाँ प्राप्त गर्नेछन् । प्रतियोगितामा ७ प्रदेश तथा ३ विभाग (सेना,प्रहरी, शसस्त्र) गरि १० टोलीका खेलाडीले प्रतिस्पर्धा गरिरहेका छन् ।

दोस्रो कृष्णप्रसाद भट्टराई स्मृति राष्ट्रिय कराते प्रतियोगिताको पदक

महिला एकल काता

स्वर्ण – चन्चला दनुवार (नेपाल पुलिस क्लब)
रजत – एलिशा रासकोटी मगर (कर्णाली)
कास्य – मिरा खाती (बागमती), रोश्मा राई (प्रदेश १)

महिला टिम काता

स्वर्ण – पुलिस
रजत – त्रिभुवन आर्मी क्लब
कास्य – एपिएफ र बागमती

पुरुष एकल काता

स्वर्ण – सोनिम मानन्धर (एपिएफ क्लब )
रजत – महसुस मोक्तान (पुलिस)
कास्य – रेहान जाभेद (मधेश), विनय लिम्बु ( आर्मी )

पुरुष टिम काता

स्वर्ण – एपिएफ
रजत – पुलिस
कास्य – आर्मी र प्रदेश १