ललितपुर (हाम्रो खेलकुद) – हरिसिद्धी उसु क्वानका सुरज श्रेष्ठ वीर गणेशमान सिंह स्मृति पाँचौ राष्ट्रिय खुला किक बक्सिङ प्रतियोगिताको पुरुषतर्फ ५० केजी तौल समूहको क्वार्टरफाइनलमा पुगेका छन् ।

सुरजले मकवानपुरका सोमलाल स्याङतानलाई हराउँदै अन्तिम आठमा पुगेका थिए । सुजनले सेमिफाइनलमा ठेचो डोजोका प्रसन्न राईसँग प्रतिस्पर्धाा गर्नेछन् । त्रिभुवन आर्मी क्लका धमेन्द्र रामले एपिएफका संगम बिकेलाई हराए । धमेन्द्रले सेमिफाइनलमा पुग्न दाङका विशाल बुढासँग खेल्नेछन् । यस्तै भिम्पा तामाङ र संजीव राई पनि क्वार्टरफाइनलमा पुगेका छन् ।

यस्तै ५५ केजी पुरुषमा नेपाल क्योक्योसिन बुदोका जय बोगटीले आयोजक टिमका अनिश पोदारलाई हराएका छन् । फाइट क्लबका तोइथ राज थापा, रुकुमका नवीन नाथ , गोर्कणेश्वर म्वाइथाइँका लाक्पा तामाङ, काल भैरबका प्रविन माझी, बिकेटी केबिसीका नवराज श्रेष्ठले मकवानपुरका बुद्ध लामालाई हराए ।

जिल्ला खेलकुद विकास समिती ललितपुर र ललितपुर जिल्ला किक बक्सिङ संघको संयुक्त आयोजनामा गोदावरी नगरपालिकाको वडा नम्बर ११ चापागाउँको प्याङगाउँ चौरमा ३ दिन सम्म चल्ने प्रतियोगितामा महिला र पुरुषमा समान ६ वटा गरि कुल १२ इभेन्ट्समा प्रतिस्पर्धा हुनेछ ।पहिलो दिन विभिन्न तौल समूहका ३१ वटा प्रतिस्पर्धा भएको प्रतियोगिताका जुरी सदस्य एवं आयोजक समितिका सदस्य दिपक श्रेष्ठले जानकारी दिए ।

महिलमा ४५ केजी , ५० केजी , ५५ केजी , ६० केजी , ६५ केजी र खुल्ला गरी ६ तौल समूहमै प्रतिस्पर्धा हुनेछ । त्यस्तै पुरुषमा ५० केजी , ५५ केजी , ६० केजी , ६५ केजी ,७० केजी र खुल्ला तौल गरी ६ तौल समूहमा प्रतिस्पर्धा हुनेछ ।

प्रत्येक तौल समूहका विजेताले ३० हजार , दोस्रो हुनेले १५ हजार र तेस्रो हुने दुबैले समान ८ हजार रुपैयाँ प्राप्त गर्ने प्रतियोगिताका संयोजक एवं परिकल्पनाकार प्रदेश सभा सदस्य मिनकृष्ण मर्हजनले जानकारी दिए । उनका अनुसार प्रतियोगितामा कुल ९ लाख ५७ हजार रुपैयाँ पुरस्कार रहेको छ ।

जनआन्दोलनका सर्वोच्च नेता गणेशमान सिंहका छोरा तथा नेपाली कांग्रेसका नेता प्रकाशमान सिंहले प्रतियोगिताको उद्घाटन गरेका थिए । उनले सरकारी तबरबाट हुन नसकेको यस्ता प्रतियोगिता आयोजना गरेकोमा आयोजकलाई धन्यवाद दिए । संघिय सांसद समेत रहेका सिंहले खेलकुदका माध्यमबाट अहिलेका पुस्ताले लौह पुरुष गणेशमानलाई चिन्ने अवसर समेत मिल्ने विश्वास व्यक्त गरे ।

पूर्व अर्थराज्य मन्त्री एवं प्रतिनिधी सभा सदस्य उदय शमसेर राणाले खेलकुदमा बजेट कम भएपनि खेल र खेलाडीको विकासका निम्ती यस्ता प्रतियोगिता आयोजना हुनु सुखद भएको बताए । २ सय ८१ जना खेलाडीले भाग लिएको प्रतियोगिता आयोजनामा मुख्य सहयोग गोदावरी नगरपालिका र सहयोगीका रुपमा बाग्मती प्रदेश खेलकुद विकास परिषद् रहेको छ ।

प्रतियोगिताको टिम च्याम्पियनले १ लाख र दोस्रो हुने टोलीले ५० हजार रुपैयाँ प्राप्त गर्नेछ । प्रतियोगिताका उत्कृष्ट महिला र पुरुष खेलाडीले समान २५ हजार रुपैयाँ प्राप्त गर्नेछन् ।