काठमाडौं (हाम्रो खेलकुद)- अस्ट्रेलियन ओपन कराते च्याम्पियनसिपमा भाग लिन नेपालबाट गएका सबै ५ खेलाडीले पदक‌ जितेका छन्।

शनिवार करातेकी कीर्तिमानी खेलाडी एरिका गरुङले स्वर्ण र बाँकी सबै खेलाडीले कास्य पदक जितेको नेपाल कराते महासंघका कोषाध्यक्ष किशोर भट्टराईले जानकारी दिए ।

हिमालयन वारियर एरिकाले ६८ केजी माथि तौल समूहमा विजेता बनेकी हुन् । महिला ६१ केजी मुनीको तौल समूहमा सविना श्रेष्ठ, ५५ केजी मुनी पुष्पका लामा र ५० केजी मुनी बर्षा बुढा मगरले कास्य पदक जितेकी हुन् ।

पुरुषतर्फ सन्तोष श्रेष्ठले ६७ केजी मुनीको तौल समूहमा कास्य पदक जितेका हुन्। अष्ट्रेलियाबाट सहभागी नेपाली खेलाडीमध्ये पुरुषतर्फ विजय श्रेष्ठले रजत तथा दिवस श्रेष्ठ र सोनम लामाले कास्य पदक जिते ।

विजयले ६० केजी मुनी तौल समूहको फाइनल खेले ।
दिवसले ८४ केजी माथि र सोनमले ६० केजी मुनीको तौल समूहमा कास्य पदक जितेका हुन् ।

सन्‌ २०२३ मा‌ १९ औं एसियाली खेलकुदमा रजत पदक जितेकी थिइन्। गत वर्ष एसियन च्याम्पियनसिपमा रजत पदक जितेकी थिइन्।

एसियाली खेलकुदमा रजत पदक जित्ने उनी पहिलो नेपाली हुन् । राष्ट्रिय च्याम्पियन रहेकी एरिकाले एसियाली खेलकुद यता भाग लिएका सबै राष्ट्रिय तथा प्रतियोगितामा पदक जितेकी थिइन्।

अष्ट्रेलियन ओपन कराते च्याम्पियनसिपमा पदक विजेता खेलाडी
१. एरिका गुरुङ – स्वर्ण पदक (+६८ के.जी.)
२. सन्तोष श्रेष्ठ – कांस्य पदक (–६७ के.जी.)
३. सविना श्रेष्ठ – कांस्य पदक (–६१ के.जी.)
४. पुष्पका लामा – कांस्य पदक (–५५ के.जी.)
५. वर्षा बुढा मगर – कांस्य पदक (–५० के.जी.)

अष्ट्रेलियाबाट सहभागी नेपाली खेलाडी
१. दिवस श्रेष्ठ – कांस्य पदक (+८४ के.जी.)
२. विजय श्रेष्ठ – रजत पदक (–६० के.जी.)
३. सोनम लामा – कांस्य पदक (–६० के.जी.)