ललितपुर (हाम्रो खेलकुद) –जिल्ला प्रमुख डोजो ललितपुर, लगनखेलले करातेका बर्ष खेलाडी घोषणा गर्दै सम्मान गर्ने परम्पराको सुरुआत गरेको छ । पहिलो सम्मान कार्यक्रममा मुकुन्द्र महर्जन र ज्योति गिरी ललितपुर कराते वर्ष खेलाडी– २०७३ अवार्डबाट शनिबार सम्मानित भएका छन् ।

मुकुन्द्रले सातौं राष्ट्रिय खेलकुदमा स्वर्ण जित्दै राष्ट्रिय खेलकुदमा स्वर्णको ह्याट्रिक गरेका थिए । ज्योतिले सातौं राष्ट्रिय खेलकुदअन्तर्गत मध्यमाञ्चल क्षेत्रीय छनोटमा रजत जितेकी थिइन् । त्यस्तै ललितपुरकै अर्का कराते खेलाडी एवं डोजोका प्रशिक्षक विप्लवलाल श्रेष्ठलाई पनि विशेष अवार्डबाट सम्मान गरियो । उनले गत अप्रिलमा थाइल्यान्डको बैंककमा भएको थाइल्यान्ड खुला कराते च्याम्पियनसिपमा कांस्य जितेका थिए ।

ललितपुरका सांसद मदनबहादुर आमात्यले उनीहरुलाई सम्मान गरेका थिए । मुकेन्द्रको अनुपस्थितिमा उनका बाबुले सम्मान ग्रहण गरेका थिए । तीनैले जनही १० हजार रुपैयाँ र सम्मान पत्र प्राप्त गरे । सोही अवसरमा डोजोका सहयोगी संस्था र व्यक्तिलाई पनि प्रशंसा पत्रबाट सम्मान गरिएको थियो । डोजोका उपाध्यक्ष समेत रहेका आठौं दक्षिण एसियाली खेलकुदका स्वर्ण पदक विजेता कराते खेलाडी रवि महर्जनले सम्मानितलाई ट्रयाकसुट प्रदान गरेका थिए ।

ललितपुर जिल्ला कांग्रेसका सभापति समेत रहेका अमात्य आफ्नो समयमा खेलाडी रहेकै कारण राजनीतिक अन्य जीवनमा सफलता मिलेको बताए । उनले पार्टीले खेलकुद मन्त्रीको जिम्मेवारी सम्हाल्ने दिने मौका दिएमा आफु तयार रहेको समेत बताए । भूकम्पबाट क्षेति पुगेको डोजोको पूर्ननिर्माणका लागि सांसद विकास कोषबाट १५ लाख रुपैयाँ दिने घोषणा गरे ।

राष्ट्रिय खेलकुद परिषद्का पूर्व कोषाध्यक्ष मीनकृष्ण महर्जनले खेलकुदमा अहिले बेथिती मौलाएकोमा चिन्ता व्यक्त गरे । डोजोका अध्यक्ष एवं नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले अहिले सम्म नेपालले दक्षिण एसियाली खेलकुदमा जितेका २० स्वर्ण पदकमध्ये ललितपुरका ७ खेलाडीले त्यो सफलता दिलाएको स्मरण गर्दै भविष्यमा पनि त्यस्तै खेलाडी उत्पादनका लागि प्रयास गर्ने बताए ।