काठमाडौं, फागुन ११
१२औं सागमा पदक जित्न सफल खेलाडी, प्रशिक्षक र व्यवस्थापकलाई नेपाल जुडो संघले नगदसहित सम्मान गरेको छ ।
राष्ट्रिय खेलकुद परिषदको ओलम्पियन सेमि कवर्ड हलमा मंगलबार एक कार्यक्रम गर्दै संघले नगदसहित सम्मान गरेको हो ।
सागमा नेपालले जुडोबाट एक स्वर्ण, दुई रजत र ६ कास्यपदक जितेको थियो । संघले सागमा स्वर्ण जित्नेलाई ५० हजार, रजत जित्नेलाई ३० हजार, कास्य विजेता र प्रशिक्षकलाई २० हजार तथा व्यवस्थापकलाई १५ हजारसहित सम्मान गरेको हो ।
स्वर्ण विजेता फुपुल्हामु खत्रीले स्वर्ण तथा लिला अधिकारी र ममता श्रेष्ठ रजत पदक जितेका थिए । यस्तै सरिता चौधरी, गंगा चौधरी, पुनम श्रेष्ठ, इन्द्र बहादुर श्रेष्ठ, रमेश मगर र शिव बहादुर बरामले कास्य जितेका थिए । दल बहादुर गुरुङ र इन्द्र डंगोल प्रशिक्षक तथा ओलम्पियन देवु थापा र गंगा बहादुर खड्का व्यवस्थापकको रुपमा रहेका थिए ।
खेलाडी, प्रशिक्षक र पदाधिकारीहरुलाई राष्ट्रिय खेलकुद परिषदका सदस्यसचिव केशव कुमार विष्ट, जुडो संघका अध्यक्ष दिपक हर्ष बज्राचार्यलगायतले नगदसहित सम्मान गरेका थिए ।
सदस्य–सचिव विष्टले सम्मान उत्साहप्रद रहेको बताउदै हंंगेरीमा विशेष प्रशिक्षणको लागि बुधबार त्यसतर्फ प्रस्थान गर्न लागेका स्वर्ण धारी फुपु ल्हामु खत्रीका तयारीका लागि आवश्यक प्रवन्ध मिलाउने वचनवद्ध गरे । सदस्य–सचिव विष्टले नेपालमा आयोजना हुन लागेको १३औं सागको लागि तयारीमा जुटिहाल्ने पनि बताए । यस्तै जुडो संघका अध्यक्ष दिपक हर्ष बज्रचार्यले निरन्तर प्रशिक्षण गरिहने मौका पाए जुडोको पदक जित्ने सम्भावना प्रवल रहेको बताए ।
कार्यक्रममा जुडो संघका सहमहासचि सुर्य नारायण श्रेष्ठले पनि मन्तव्य राखेका थिए ।
