अर्जुन कार्की, बागलुङ
गत महिना स्वदेशमा सम्पन्न १३ औं दक्षिण एसियाली खेलकुद (साग) का पदक विजेता बागलुङका खेलाडीलाई गृह जिल्लामा शुक्रबार सम्मान गरिएको छ । बागलुङ उद्योग बाणिज्य संघको आयोजना सुरु भएको छैटौं बागलुङ महोत्सवमा १३ औं सागमा कराते तर्फबाट स्वर्ण र कास्य पदक जित्ने २ जना खेलाडीलाई सम्मान गरिएको हो ।

करातेमा स्वर्ण पदक जित्ने नविन रसाईली र कास्य पदक जित्ने उनका दाजु राजकुमार रसाईलीलाई सम्मान गरेको हो । नविनले ६७ केजीमा पकिस्तानका खेलाडीलाई फाइनलमा ८–६ ले पराजित गर्दै स्वर्ण पदक जितेका थिए । राजकुमार सम्मिलित टिम कुमुते तर्फ सेमिफाइनलमा पाकिस्तानी टोलीसँग ३–० ले पराजित भएका थिए । उनको टिममा मुकुन्द महर्जन र अर्जुन कुमार बाघचन्द रहेका थिए ।

सागमा बागलुङका साफिया पुनले महिला भलिबलमा रजत र करण केसीले क्रिकेटमा कास्य पदक जितेका थिए । करण र साफियालाई अर्को कार्यक्रमाम सम्मान गरिने उद्योग बाणिज्य संघ बागलुङका महासचिव नरेश कंडेलले जानकारी दिए ।