काठमाडौं (हाम्रो खेलकुद)– तेक्वान्दो खेलाडी पलेशा गोबद्र्धनले एसियन युथ पारा गेम्सको तेक्वान्दोमा स्वर्ण पदक जितेकी छिन् ।

यसै वर्ष जापानमा भएको टोकियोमा भएको पारालिम्पिक्समा दुई फाइट जितेकी पलेशाले बहराइनको मानमामा जारी एसिया युथ पारा गेम्सको ५७ केजी मुनी क्याटागोरी ४४ मा एतिहासिक स्वर्ण पदक जितेकी हुन् । पलेशलो इरानकी इब्राहिमी रोजालाई ६–० ले हराउँदै स्वर्ण पदक जितेकी हुन् ।

राष्ट्रिय खेलकुद परिषद् (राखेप) का अनुसार सोही युथ पारा गेम्समा तेक्वान्दोकै सृजना घिसिङले रजत र विशाल गरबुजाले कास्य पदक जितेका छन् । ५२ केजी मुनी क्याटागोरी ४४ को फाइनलमा सृजना इरानकी गानबारिकोमिसाइनीसँग १८–० ले पराजित भएकी थिइन् ।

विशाल सेमिफाइनलमा पराजित भएका थिए । ५८ केजी मुनी क्याटागोरी ४४ को सेमिफाइनलमा विशाल उज्वेकिस्तानका सोनजारोभ कुद्राटिलोसँग ३२–६ ले पराजित भएका थिए ।

५ मिनेटको एक राउन्डमा भएको फाइनलमा पलेशाले धर्यतापूर्वक खेलेर स्वर्ण पदक जितेको उनका प्रशिक्षक कविराज नेगी लामाले बताए । ‘पलेशा निकै अनुभवी खेलाडी हुन् । उनले दिमाग लगाएर खेलिन्,’लामाले भने, ‘विगतमा जस्तो उनले हतार नगरी खेलिन् र सफलता प्राप्त गरिन् । यो पारा खेलाडीको ठूलो सफलता हो ।’ जापानको पारालिम्पिक्समा पनि लामा नै पलेशको प्रशिक्षक थिए ।