काठमाडौं (हाम्रो खेलकुद) – सेटर कृपा अधिकारी र मिडल ब्लकर मनिषा चौधरीले महिला राष्ट्रिय भलिबल टोलीमा पूनरागमन गरेका छन् । नेपाल भलिबल संघले बंगलादेशमा हुने एभिसी एसियन सेन्ट्रल जोन महिला तथा पुरुष भलिबल च्याम्पियनसिपका लागि शनिबार १५ सदस्यीय टोलीबाट १२ सदस्यीय अन्तिम टोलीको घोषणा गर्दा कृपा र मनिषाले राष्ट्रिय टोलीमा पूनरागमन गरे ।

महिला टोलीका मुख्य प्रशिक्षक जगदिश भट्टले आफूले टोलीको नामावली भलिबल संघलाई बुझाइसकेको जानकारी दिए । सेनाको तालिम सकाएसँगै उनी गत वर्षबाट भलिबलमा फर्केकी थिइन् । त्यसयता राष्ट्रिय टोलीको पहिलोपटक प्रशिक्षण हुदा कृपाले आफ्नो स्थान सुरक्षित गरेकी हुन् । यो बीचमा कृपा र मनिषाले सन् २०१९ मा बंगलादेशमा भएको प्रथम सेन्ट्रल जोन र नेपालमा भएको १३औं दक्षिण एसियाली खेलकुद (साग) उनीहरु टोली बाहिर थिए ।

यस्तै यसअघिको प्रशिक्षणमा रहेपनि शान्ति र कामनाले पहिलोपटक राष्ट्रिय टोलीमा स्थान बनाउँदा लक्ष्मीले पहिलो अवसरमै राष्ट्रिय टोलीमा स्थान बनाउन सफल भएकी हुन् । शान्ति आर्मीको तथा कामना र लक्ष्मीले नेपाल पुलिसबाट व्यवसायिक खेल खेल्दै आइरहेकी छन् ।

१५ सदस्यीय टोलीमा यसपटक यसअघि राष्ट्रिय टोलीमा नियमित रहेकी निरुता ठगुन्नाले राष्ट्रिय टोलीमा स्थान बनाउन सकिनन् । कविता भट्ट र सरस्वती जैसी पनि अन्तिम टोलीमा पर्न सकेनन् । महिला र पुरुषको च्याम्पियनसिप पुस ६ देखि १४ गते सम्म बंगलादेशको ढाका आयोजना हुदैछ । नेपाल महिला संस्करणको साविक च्याम्पियन हो ।

महिला भलिबलको अन्तिम टोली

प्रतिभा माली, सरस्वती चौधरी, शान्ति थारु, उषा भण्डारी, साफिया पुन, सुनिता खड्का, मनिषा चौधरी, कामना विष्ट, लक्ष्मी चन्द, सलिना श्रेष्ठ, अरुणा शाही र कृपा अधिकारी