उत्तम रिजाल, झापा

दमक नगरपालिका र झापा गाउँपालिका प्रदेश १ स्तरीय अन्तर पालिका कनकाई कप भलिबल प्रतियोगिताको उपाधिका लागि भिड्ने भएका छन् । झापाको सुरुङ्गमा जारी प्रतियोगिताको मंगलबार सेमिफाइनलमा विजयी हुँदै दमक र झापाले फाइनल भेट पक्का गरेका हुन् ।

दमकले मोरङ्गको बेलबारी नगरपालिका र झापाले भोजपुरको आमचोक गाउँपालिकालाई पराजित गर्दै एकअर्कासँगको भेट पक्का गरेका हुन् ।
दमकले पहिलो सेमिफाइनलमा बेलबारीलाई सोझो सेटमा पराजित गर्दै फाईनल यात्रा तय गरेको थियो । दमकले बेलबारीलाई २५–१७, २५–१७ र २५–२१ को सोझो सेटमा हराएको थियो । राष्ट्रिय भलिबल टोलीका समेत सदस्य रहेको दमकका हरिहजुर थापा खेलको म्यान अफ द म्याच घोषित भए । उनले एक हजार रुपैयाँसहित ट्रफी हात पारे ।

अर्को सेमिफाइनलमा झापाले आमचोकलाई २५–१५, २५–२३ र २५–१९ सोझो सेटमा पराजित गर्यो । त्यसमा झापाका किरण भट्टराई म्यान अफ द म्याच चुनिए । उनले एक हजार रुपैयाँसँगै ट्रफी हात पारे । सेमिफाइनलमा पराजित टोलीले तेस्रो स्थानका लागि प्रतिस्पर्धा गर्नेछन् ।

सुरुङ्गा जेसिसको आयोजनामा जारी प्रतियोगितामा ६ टोलीको सहभागिता रहेको छ । प्रतियोगिताको विजेताले १ लाख १ हजार १ सय ११ तथा दोस्रो टोलीले ५१ हजार रुपैयाँ प्राप्त गर्नेछ । तेश्रो हुने टोलीले २५ हजार ५ सय तथा चौथो हुने टोलीले १२ हजार १ सय रुपैयाँ प्राप्त गर्नेछ । हात पार्ने छन् । प्रतियोगिताको आयोजना सुरुङ्गा जेसीजले गरेको हो ।