काठमाडौं (हाम्रो खेलकुद)– राष्ट्रिय खेलकुद परिषद् (राखेप) पूर्व सदस्य सचिव स्वर्गिय शरदचन्द्र शाहलाई मरणोपरान्त लाइफ टाइम एचिभमेन्ट अवार्ड दिइएको छ । नेपाल खेलकुद पत्रकार मञ्चले आयोजना गर्ने पल्सर स्पोर्टस अवार्डको मंगलबार १८ औं संस्करणमा शाहलाई लाइफ टाइम एचिभमेन्ट गोल्डेन सेल्युट अवार्डबाट सम्मानित गरेको हो ।

२०३४ देखि २०४५ सम्म राखेपको नेतृत्व गरेका शाहको समयमा वृहत राष्ट्रिय खेलकुद प्रतियोगिता र अन्तर नगर खेलकुदको सुरुवात गरेका थिए। अन्तर्राष्ट्रिय रुपमा दक्षिण एसियाली खेलकुद सागको सुरुवातका लागि पहल लिने मध्ये शाह एक थिए । उनकै समयमा देश भित्र खेलकुदका पूर्वाधार निर्माण भएको थियो ।

शाहको कार्यकालमा ७५ वटै जिल्लामा कवर्ड हल र पाँच विकास क्षेत्रमा रंगशाला निर्माण गरिएको थियो । जुन हालसम्म पनि नेपाली खेलकुदमा सबैभन्दा महत्त्वपूर्ण कदम मानिन्छ । खेलकुद विकासका लागि शाहले ’खेलकुद कर’ अवधारणा ल्याएका थिए । अन्तर्राष्ट्रिय खेल संस्थासँग उनको सम्बन्ध बलियो थियो। उनी एसियाली ओलम्पिक कमिटीको उपाध्यक्ष समेत बनेका थिए भने नेपाल ओलम्पिक कमिटीको नेतृत्व पनि सम्हालेका थिए । शाहकी धर्मपत्नी र सुपुत्रीले अवार्ड ग्रहण गरेका थिए ।

सदस्य सचिव शाहको युग २०४५ सालमा दशरथ रंगशालामा घटेको फुटबल काण्ड संगै समाप्त भएको थियो । कम्तिमा ७२ जना दर्शकको ज्यान जाने घटना पछि उनीसँगै राखेपको तत्कालिन नेतृत्वले राजीनामा दिएको थियो । शाहको ०६९ असार ५ मा सिंगापुरमा निधन भएको थियो ।