काठमाडौं (हाम्रो खेलकुद) – नेपालले चीनको हान्झाउमा भदौ/आसोजनमा आयोजना हुने १९ औं एसियाली खेलकुदमा २३ खेलमा भाग लिने भएको छ । एसियाड भदौ २५ देखि असोज ९ गते सम्म सञ्चालन हुनेछ ।

युवा तथा खेलकुद मन्त्री तथा राष्ट्रिय खेलकुद परिषद् (राखेप) का अध्यक्ष महेश्वर गहतराजको अध्यक्षतामा शुक्रबार बसेको बोर्ड बैठकले एसियाडमा भाग लिने खेल संख्या तय गरेको हो । सोही बैठकले जेठ २२ देखि २८ गते सम्म गण्डकी प्रदेशको पोखरामा आयोजना नवौं राष्ट्रिय खेलकुदमा ३६ खेल समावेश गर्ने निर्णय गरेको छ ।

एसियाडमा नेपालले तेक्वान्दो, कराँते, बक्सिङ, एथलेटिक्स, साईक्लिङ, महिला फुटबल, गल्फ, कुस्ती, भारत्तोलन, जुडो, पौडी, ट्रायथेलेन, उसु, आर्चरी, बास्केटबल, कबड्डि, फेन्सीङ, ह्याण्डबल, टेबल टेनिस, महिला भलिबल, पुरुष क्रिकेट, सुटिङ र ब्याडमिन्टनमा भाग लिने निर्णय गरकेो छ । एसियाडको १८ औं संस्करणमा नेपालले २९ खेलमा भाग लिएको थियो । जसमा प्याराग्लाडिङमा नेपालले एक मात्र रजत पदक जितेको थियो ।

यसअघिका एसियन खेलमा खेलाडीको नतिजा तथा पछिल्लो समयमा सफलता प्राप्त भईरहेका खेलहरुका आधारमा एशियाडमा समावेश हुने खेलको तय गरिएको बताइएको छ । बैठकले एसियाडमा खेलमा भाग लिने खेलका खेलाडीको छनौट, बन्द प्रशिक्षण तथा आवश्यक बजेट र तयारीका सम्बन्धमा समेत प्रक्रिया अघि बढाउने समेत निर्णय गरेको बताइएको छ ।