काठमाडौं (हाम्रो खेलकुद) – विभागीय नेपाल एपीएफ क्लबकी सरस्वती राना र त्रिभुवन आर्मी क्लबका इन्द्र सुनार वीर गणेशमान सिंह स्मृति राष्ट्रिय बक्सिङ प्रतियोगितामा सर्वाेत्कृष्ट खेलाडी चुनिएका छन् ।

सरस्वती महिलातर्फ तथा इन्द्र पुरुषतर्फ सर्वाेत्कृष्ट चुनिएका हुन् । बसन्तपुर डबलीमा शनिबार भएको अन्तिम दिनको स्पर्धामा उनीहरुले आ–आफ्नो तौल समूहमा स्वर्णपदक जित्न सफल भएका थिए । महिलातर्फको सर्वाेत्कृष्ट सरस्वतीले एक थान स्कुटर तथा पुरुषतर्फको सर्वाेत्कृष्ट इन्द्रले एक थान मोटरसाइकल हात पारे ।

सरस्वतीले महिला ७५ केजी तौल समूहमा आर्मीकी निरु गुरुङलाई अंकको आधारमा हराउँदै स्पर्ण जित्न सफल भएकी भइन् । यस्तै आर्मीका इन्द्रले ५७ केजी तौल समूहमा सागका पदकधारी पुरन राईलाई हराउँदै स्वर्ण जित्न सफल भएका थिए ।

गत मंगलबारदेखि शुरु भएको प्रतियोगितामा आर्मी ८ स्वर्ण र ३ रजतपदक जित्दै टिम च्याम्पियन बन्न सफल भयो । दोस्रो भएको एपिएफले २ स्वर्ण, ४ रजत ३ कास्य जित्न सफल भए । समान २ स्वर्ण, रजत र कास्य जितेको पुलिस तेस्रो भयो । प्रदेश १ र प्रदेश ७ ले समान एक रजत जित्न सफल भए ।

प्रतियोगितामा पुरुषतर्फ ७ र महिलामा ५ गरी १२ स्पर्धा समावेश गरिएको थियो । प्रतियोगितामा सातै प्रदेश र तीन विभागीय टोली आर्मी, प्रहरी र एपीएफ गरी १० टिमका १ सय २ खेलाडीले प्रतिस्पर्धा गरेका थिए ।