काठमाडौं (हाम्रो खेलकुद) – राष्ट्रिय खेलकुद परिषद् (राखेप) को आयोजनामा १२ औं केन्द्रीय स्तरीय राष्ट्रपति रनिङ सिल्ड खेलकुद प्रतियोगिता मंगलबार राजधानीमा सुरु भएको छ ।

विभिन्न ६ खेल समावेश प्रतियोगितामा प्रदेश १ र मधेश प्रदेश बाहेक ५ प्रदेशको सहभागिता रहेको छ । भलिबल, कबड्डी, एथलेटिक्स, तेक्वान्दो, कराते र उसुमा ५ सय खेलाडीले प्रतियोगितामा भाग लिएको राखेपले जनाएको छ । एथलेटिक्समा २६, करातेमा ८, तेक्वान्दो र उसुमा समान ६, भलिबल र कबड्डीमा समान २ गरी ५० स्वर्णका लागि प्रतिस्पर्धा हुने बताइएको छ ।

पदकका आधारमा समग्रमा शीर्ष तीन स्थानमा रहने टोली र खेलाडीका लागि कुल ९ लाख ४५ हजार रुपैयाँ पुरस्कार रहेको बताइएको छ। बिहीबारसम्म चल्ने प्रतियोगिता प्रदेश संरचनामा आयोजना भएको यो तेस्रो पटक हो ।

एथलेटिक्स – निशालाई स्वर्ण
एथलेटिक्सको छात्रा १ सय मिटर दौडमा लुम्बिनी प्रदेशकी निशा चौधरी पहिलो भइन् । निशाले १२.५३ सेकेन्डमा निर्धारित दूरी पूरा गरिन् । लुम्बिनीकै रेशु थारु दोश्रो तथा बागमती प्रदेशकी कृतिका रन्जितकार तेश्रो भए ।

छात्रा १ हजार ५ सय मिटर दौड ५ मिनेट २१.० सेकेन्डमा पूरा गरेकी गण्डकी प्रदेशकी जानकी खराल पहिलो भइन् । कर्णाली प्रदेशकी हिमाली शाही दोश्रो तथा कर्णालीकै मोतीकला डाँगी तेश्रो बने ।

त्रिपुरेश्वरस्थित दशरथ रंगशालामा भएको छात्रा हाइजम्पमा लुम्बिनीकी प्रमिला चौधरी शीर्ष स्थानमा रहिन् । प्रमिलाले १.३० मिटर जम्प गरिन् । गण्डकीकी सीमा श्रेष्ठ र कर्णालीकी मापसना रसाइली संयुक्त रुपमा दोश्रो भए । दुवैले १.२५ मिटर जम्प गरे ।

कराते – रेहान र सन्जुको जित
करातेको एकल कातातर्फ पुरुषमा बागमतीका रेहान जोवद तथा महिलामा बागमतीकै सन्जु देशार पहिलो भएका छन् ।
सातदोबाटोस्थित अन्तर्राष्ट्रिय खेलकुद परिसरको कराते हलमा भएको प्रतियोगिताको पुरुषमा लुम्बिनीका प्रजित बैजाली मगरले रजत तथा गण्डकीका प्रिन्स गुरुङ र कर्णालीका लक्ष्मणकुमार शाहीले कांस्य जिते । महिलामा बागमतीकी प्रजिस्मा श्रेष्ठ दोश्रो तथा कर्णालीका प्रियंका शाही र ममता नेपाली तेश्रो भइन् ।

भलिबल – सदूरपश्चिम सेमिफाइनलमा
भलिबलको छात्रमा सुदूरपश्चिम सेमिफाइनलमा प्रवेश गरेको छ । समूह ‘बी’ को लिगमा सुदूरपश्चिमले कर्णालीलाई ३०–३२, २५–१४ र २५–१२ को सेटमा पराजित ग¥यो । कर्णाली पनि समूह उपविजेता बन्दै सेमिफाइनलमा पुग्न सफल भयो ।

समूह ‘ए’ मा लुम्बिनीले मिश्रित प्रदर्शन ग¥यो । गण्डकीले लुम्बिनीलाई १८–२५, २५–१७ र ३०–२८ ले हरायो । बागमती विरुद्धको खेलमा भने लुम्बिनी २५–१८, २३–२५ र २५–१५ ले विजयी भयो ।

त्रिपुरेश्वरस्थित राखेप कभर्डहलमा भएको छात्राको प्रतिस्पर्धामा गण्डकीले कर्णालीलाई २५–११ र २५–१६ को सोझो सेटमा पन्छ्याउदै सेमिफाइनल यात्रा तय ग¥यो । जितसंगै गण्डकी समूह ‘बी’ को विजेता भयो । कर्णाली पनि समूह उपविजेताका हैसियतले सेमिफाइनलमा पुग्यो ।

समूह ‘ए’ मा दोहोरो जित निकाल्दै लुम्बिनीले सेमिफाइनलमा स्थान सुरक्षित ग¥यो । लुम्बिनीले सुदूरपश्चिमलाई २५–२१ र २५–१२ तथा बागमतीलाई २५–२१ र २५–२३ को सीधा सेटमा पराजित गर्यो ।

कबड्डी – लुम्बिनीसँग गण्डकीको हार
कबड्डीको छात्रमा लुम्बिनीले गण्डकीलाई ६९–३६ र कर्णालीलाई ६८–३४ तथा सुदूरपश्चिमले बागमतीलाई ६८–३४ ले पराजित गरे । लैनचौरस्थित राष्ट्रिय टेबलटेनिस प्रशिक्षण केन्द्रमा भइरहेको प्रतियोगिताको छात्रामा बागमतीले कर्णालीलाई ३१–२६, सुदूरपश्चिमले गण्डकीलाई ६६–३९ र लुम्बिनीले बागमतीलाई ३६–२४ ले हराए ।

राउन्ड रोविन लिगका आधारमा भइरहेको प्रतियोगिताको छात्र÷छात्रा दुवैमा समान ५ टोलीको सहभागिता रहेको छ । राउन्ड रोविन लिगपछि अंकका आधारमा विजेताको टुंगो लाग्नेछ ।

खेलकुद मन्त्रीद्वारा उद्घाटन
युवा तथा खेलकुद मन्त्री महेश्वरजंग गहतराजले प्रतियोगिताको उद्घाटन गरे । मन्त्री गहतराजले विद्यालयस्तरीय प्रतियोगिताबाटै भविष्यमा अन्तर्राष्ट्रिय प्रतियोगितामा सहभागी हुने खेलाडीको पहिचान गर्न सकिने भएको हुँदा प्रतियोगिता महत्वपूर्ण भएको बताए ।

राखेपका सदस्य–सचिव टंकलाल घिसिङले विद्यालयस्तरीय प्रतियोगितानै खेलकुदको मेरुदण्ड भएको धारणा व्यक्त गर्दै कलिलो उमेरका खेलाडीलाई संरक्षण गर्न सके देशका लागि सक्षम खेलाडी तयार गर्न सकिने बताए ।

पाँचै प्रदेशका खेलाडीले मार्च पास्ट गरेका थिए । कपन टाइगरका तेक्वान्दो खेलाडीले आकर्षक र साहसिक प्रदर्शनी गरेका थिए । अक्सिडेन्टल पब्लिक स्कुलका विद्यार्थीले नृत्य प्रस्तुत गरे भने नेपाल ब्रेकिङ एन्ड डान्स स्पोर्ट्स संघले व्यवस्थापन गरेको ‘बी बोयिङ’ प्रस्तुत भएको थियो ।

ओलम्पियन जुडोकी सोनिया भट्टले उद्घाटन स्थल त्रिपुरेश्वरस्थित दशरथ रंगशालाको ट्रयाकमा ओलम्पिक टर्च परिक्रमा गराएका थिइन् । राष्ट्रपति रनिङ सिल्ड खेलकुदको कुनैपनि उद्घाटन कार्यक्रममा ओलम्पिक टर्च परिक्रमा गराइएको पहिलो हो । निर्णायकको तर्फबाट एथलेटिक्सका प्रमुख प्रशिक्षक चन्द्र गुरुङ र खेलाडीको तर्फबाट गण्डकी प्रदेशकी एथलेटिक्स खेलाडी तीर्था ढकालले शपथ लिएका थिए ।