झापा (हाम्रो खेलकुद) – मेचिनगर नगरपालिकामा नयाँ वर्षको अवसरमा वडा स्तरीय फुटसल प्रतियोगिता हुने भएको छ । धुलावारी फुटसल एरिनामा वैशाख १ गतेदेखि ९ गते सम्म प्रथम मेचिनगर वडा स्तरीय फुटसल प्रतियोगिता आयोजना हुने भएको छ ।
मेचिनगर भित्रका १५ वडाका टिमलाई समाावेश गरिने प्रतियोगिताका संयोजक तथा धुलावारी फुटसलका संचालक विवेक बस्नेतले जानकारी दिएका छन् । युवा माझ निकै लोकप्रिय बन्दै गएको फुटसलका खेलाडीहरुलाई हैसला प्रदान गर्न नयाँ बर्षको उपलक्षमा आयोजना गरिने फुटसल प्रतियोगिताको सह–आयोजक हलेसी मेडिकल हल रहेको छ ।
प्रतियोगिताको विजेताले ३० हजार, दोस्रो टोलीले १५ हजार रुपैयाँ प्रदान गरिने प्रतियोगिताको सहआयोजक हलेसी मेडिकल हलका संचालक सोम ओझाले जानकारी दिएका छन् । त्यस्तै प्रतियोगितामा विभिन्न विधाका उत्कृष्ट खेलाडीले पनि नगद पुरस्कार पाउने बताइएको छ ।
धुलावारी फुटसल एरिनाले आफ्नो स्थापना काल देखिनै विद्यार्थी, संघ संस्था र युवाहरुलाई लक्षित विभिन्न प्रतियोगिता संचालन गरिसकेको छ ।
