काठमाडौं (हाम्रो खेलकुद)- नेपाल ओलम्पिक कमिटी (एनओसी) का उपाध्यक्ष तथा कार्यकारी निर्देशक चतुरानन्दराज बैद्यले यसै साता हान्झोउमा हुने १९ औं एसियाली खेलकुदको चिफ–डि–मिसन बैठकमा सहभागिता हुने भएका छन् ।

एनओसीका अनुसार दुई दिने बैठक मंगलबार र बुधबार हुनेछ । अबको एसियाली खेलकुद यसै असोज ६ गते देखि २१ गते सम्म हुँदैछ । बैठकमा प्रतियोगिताको आयोजनाबारे छलफल हुनेछ । यस्तै बैठकमा सहभागी हुने प्रतिनिधिलाई प्रतियोगिताको क्रममा प्रयोग हुने खेल स्थलबारे पनि जानकारी दिइनेछ ।

प्रतियोगिताका लागि ४४ खेल स्थल प्रयोगमा हुने बताइएको छ । त्यसमध्ये १४ नयाँ रहेका छन् । हान्झोउ एसियाली खेलकुदमा ४० खेल समावेश हुने बताइएको छ । एसियाडमा नेपालले भने २३ खेलमा १ सय ६८ खेलाडीको सहभागिता रहने प्रारम्भिक तयारी भएको चैत २९ गते पत्रकार सम्मेलनमार्फत राष्ट्रिय खेलकुद परिषद् (राखेप) ले जानकारी गराएको थियो ।

रणनीतिक (पदक जित्ने सम्भावना भएको) र आम सहभागिताका हिसाबले एसियाली खेलकुदमा भाग लिने २३ खेललाई तीन वटा श्रेणीमा विभाजन गरिएको राखेप सदस्य सचिव टंकलाल घिसिङले बताएका थिए । राखेपले पदकको बढी सम्भावना देखेको बक्सिङ, तेक्वान्दो, करातेलाई उच्च प्राथमिकता, ११ खेल एथलेटिक्स, साइक्लिङ, फुटबल, गल्फ, जुडो, ट्रायथोलन, उसु, भलिबल, कुस्ती, पौडी, भारोत्तोलनलाई प्राथमिकता र बाँकीलाई अर्को श्रेणीमा राखेको छ ।

राखेपले खेलाडी छनोट र प्रशिक्षणको समय तालिका समेत तयार पारेको सदस्य सचिवले जानकारी दिए । उनका अनुसार वैशाख ३ देखि ७ गते सम्म पहिलो चरणमा ४ सय २५ खेलाडी छनोट हुने बताएका थिए । तर, पहिलो चरणको खेलाडीको छनोटका विषयमा भने राखेपले थप जानाकरी दिएको छैन ।