हाङ्गचौ (हाम्रो खेलकुद) – नेपालका अन्तर्राष्ट्रिय भलिबल रेफ्री पूर्ण प्रसाद चौलागाईं  चीनको हाङ्गचौमा जारी १९ औं एसियाली खेलकुदको पुरुष भलिबलमा खेल संचालनका क्रममा विभिन्न जिम्मेवारी निर्वाह गरेका छन् ।

उद्घाटन समारोह अघि नै सुरु भएको पुरुष भलिबलमा चौलागाईंले विगत चार दिन देखि हरेक दिन जिम्मेवारी पाउँदै आएका छन् । शुक्रबार उनले जापान र काजक्सतानबीचको खेलमा च्यालेन्ज रेफ्रीको भूमिका निर्वाह गरेका थिए ।

त्यसअघि दोस्रो दिन बुधबार उनले पाकिस्तान र चाइनिज ताइपेको खेलमा सेकेन्ड रेफ्रीको जिम्मेवारी पाएका थिए । त्यस्तै तेस्रो दिन बिहीबार चौलागाईंले कतार र हङकङबीचको खेलमा पनि दोस्रो रेफ्रीको भूमिका निर्वाह गरेका थिए ।

एसियाडमा मौका पाउनुलाई चौलागाईंले रेफ्री जीवनको ठूलो उपलब्धिको रुपमा लिएका छन् । ‘अत्याधुनिक स्रोत सुबिधामा खेलाउन पाउँदा निकै खुसी छु । सुरुका दिनमा केहि अत्तालिएको थिए । तर जुरीहरुले तिम्रो प्रदर्शनमा सुधार छ भने पछि मनोबल बढ्यो ,’ चौलागाईंले भने, ‘हरेक दिन म्याच पाइरहेको छु । नयाँ नियम, प्रविधिसँग अभ्यस्त हुन पाएको छु । सिनियर रेफ्रीहरुसँगै खेलाउन मौका पाउनु उपलब्धि मानेको छु ।’

गत मेमा चौलागाईंसहित चार नेपाली एभिसी इन्टरनेसनल रेफ्री क्यान्डिडेटबाट अन्तर्राष्ट्रिय रेफ्री बन्न सफल भएका थिए । नेपालमा भएको काभा महिला भलिबल च्यालेन्ज कपमा मुख्य रेफ्रीको भूमिकामा दुई अन्तर्राष्ट्रिय खेल खेलाएसँगै चौलागाईं सहित टहलसिंह थापा, विजय केसी र विकास गुरुङ अन्तर्राष्ट्रिय रेफ्रीमा बढुवा भएका थिए ।

सन् २००९ क्षेत्रिय रेफ्री बनेका जुम्लाका चौलागाईं २०१३ मा राष्ट्रिय रेफ्री बनेका थिए । सन् २०१५ मा थाइल्यान्डमा सिनियर रेफ्री रिफ्रेसर कोर्ष पूरा गरेका उनी २०१७ को मेमा इन्टरनेसनल रेफ्री क्यान्डिडेट कोर्ष पूर्ण गर्दै इन्टरनेसनल रेफ्री क्यान्डिडेट बनेका थिए ।

चौलागाईंले दक्षिण एसियाली खेलकुद (साग) र सेन्ट्रल जोनलगायतका अन्तर्राष्ट्रिय प्रतियोगितामा रेफ्रीको भुमिका निभाइसकेका छन् । जारी एसियाडमा ब्याडमिन्टनका उदय अर्याल र तेक्वान्दोका कोशिसबहादुर खड्काले पनि रेफ्रीको भूमिका निर्वाह गर्ने बताइएको छ ।