काठमाडौं (हाम्रो खेलकुद) – १९औं एसियाली खेलकुद (एसियाड) अन्तरगत पुरुष भलिबलमा पाकिस्तानले भारतलाई पराजित गरेको छ ।

पाँचौं स्थानको लागि मंगलबार भएको रोमाञ्चक र प्रतिस्पर्धात्मक बनेको खेलमा पाकिस्तानले भारतमाथि ३–० को सोझो सेटमा सेटमा पराजित गरेको हो । सबै तीन सेटमा बलियो चुनौती पेश गरेपनि भारतले खेल आफ्नो पोल्टामा पार्न सकेन ।

चाइना टेक्सटाइल सिटी स्पोर्ट्स सेन्टर जिम्नेसियम हाङ्गचौमा पाकिस्तानले पहिलो सेट २५–२१ ले आफ्नो पक्षमा पार्यो । रोमाञ्चक र प्रतिस्पर्धात्मक बनेको पहिलो सेटमा २०–२० को बराबरीबाट ब्लकबाट लगातार ४ अंक जोड्दै पाकिस्तान सेट पोइन्टमा पुगेको थियो ।

त्यसपछि भारतले सर्भिसमा गल्ती गरेपछि पाकिस्तानले पहिलो सेट जित्न सफल भयो । दोस्रो सेटमा सुरुवातदेखि नै अग्रता लिएको पाकिस्तान २५–२० ले विजयी भयो । एक समय पाकिस्तान २२–१६ को बलियो अवस्थामा रहँदा भारतले पूनरागमन प्रयास गर्दै खेललाई २०–२४ को स्थितिमा ल्याएपनि भारतले पाकिस्तानलाई नतिजा सुम्पियो ।

रोमाञ्चक बनेको तेस्रो सेट पाकिस्तानले २५–२३ ले आफ्नो पक्षमा पार्दै खेल जित्न सफल भयो । ५–५ को बराबरीबाट खेलमा फर्किएको पाकिस्तानले ९–६ को अग्रता लिदै जिततर्फ अग्रसर बन्यो । लगातार खेलमा पछि परेको भारतले खेललाई २२–२३ को स्थितिमा ल्याउँदै दवाव बढाएपनि पाकिस्तानलाई नतिजा सुम्पन पुग्यो ।

यस जितसँगै १९औं एसियाली खेलकुद (एसियाड) अन्तरगत पुरुष भलिबलमा पाकिस्तान पाँचौं तथा भारत छैटौं भएको छ ।कतारलाई ३–१ को सेटमा पराजित गर्दै जापान तेस्रो भएको छ ।

स्वर्ण पदकका लागि चीन र इरानले प्रतिस्पर्धा गर्दैछ । नेपाल भने दुई खेलमा पराजित हुँदै बाहिरिसकेको छ ।