विजय नेपाली, पोखरा

खुल्ला सेभेन ए साइड फुटबल प्रतियोगिताको दोस्रो दिन ६ खेल सम्पन्न भएका छन् । चार खेलमा भने वाकओभर भएको छ ।

एट टु नाइन गाइजको आयोजनामा पोखरा १३ माछापोखरी खेल मैदानमा भएको दोस्रो दिनको शुक्रबबारको पहिलो खेलमा नेभरमिट एफसीले मसिना एफसीलाई २–० ले हराउँदै दोस्रो चरणमा पुग्यो ।

दोस्रो खेलमा रामघाट गुम्बा ‘ए’ ले मन्थन एफसीलाई १–० ले हरायो । तेस्रो खेलमा नमस्ते एफसीले एनएनएस बि १३ बाट वाकओभर पायो । चौथो खेलमा लामागाउँले संगम एफसीलाई टाइब्रेकरमा ३–२ गोल अन्तरले हरायो । निर्धारित समय गोलरहित बराबरीमा टुंगिएपछि टाइब्रेकरमा धकेलिएको थियो ।

पाचौं खेलमा नदिपुरले ढुङ्गेसाघुबाट वाकओभर पायो । छैटौं खेलमा गेमशालाले कमलपोखरीलाई टाइब्रेकरमा २–० गोलले हराउँदै अघिल्लो चरण्मा पुग्यो । निर्धारित समय १–१ गोलको बराबरीमा सकिएपछि खेल टाइब्रेकरमा गएको थियो ।

सातौं खेलमा बि–१३ ले भण्डारढिकबाट वाकओभर पाएको हो । आठौं खेलमा म्याग्दी चोकले सनसेटलाई ४–१ ले हरायो । नवौं खेलमा रामघाट गुम्बा एले बिएनएस रुद्र एफसीबाट वाकओभर पाएको हो ।

प्रतिस्पर्धात्मक अन्तिम खेलमा रन्जन मेमोरियलले केआईइसी बुनलाई सडनडेथमा ४–३ गोलले हराउँदै अघिल्लो चरणमा पुग्यो । निर्धारित समयको खेल १–१ गोलको बराबरीमा रोकिएपछि खेल टाइब्रेकरमा गएको थियो । टाइब्रेकरमा पनि बराबरी भएपछि निर्णय सडनडेथबाट भएको थियो ।

फुटबल तथा रग्बी खेलाडी यशोदा बोहोरालाई आर्थिक सहयोग गर्नका लागि प्रतियोगिताको आयोजना गरिएको प्रतियोगिता संयोजक लोक गुरुङले बतए । यशोदा नेपालमा भएको यु–२० एसिया रग्बी सेभेन्सको तयारीको प्रशिक्षणका दौरान घाइते भएकी थिइन् । यशोदा यु–१५ साफ महिला फुटबल च्याम्पियनसिपमा नेपालले स्वर्ण जितेको टोलीकी सदस्य हुन् ।