पोखरा (हाम्रो खेलकुद) – अर्को महिना पोखरामा आयोजना हुने चौथो संस्करणको टाइगर कप अन्तर्राष्ट्रिय आमन्त्रण महिला तथा पुरुष भलिबल प्रतियोगितामा भारत र श्रीलंकाको‌ क्लबको पनि सहभागिता हुने भएको छ ।

टाइगर ग्रुप अफ पोखरा नेपालको आयोजनामा हुने माघ १ गते देखि ६ गते सम्म हुने टाइगर कप महिला र पुरुषमा गरि १२ टोलीको सहभागिता रहने शुक्रबार आयोजित पत्रकार सम्मेलनमा टाइगर ग्रुपका अध्यक्ष अध्यक्ष नारायण प्रसाद शर्माले बताए ।

टाइगर कपमा पहिलो पटक सहभागिता जनाउन भारत हरियाणा राज्यको महिला पुलिस क्लब पोखरा आउने भएको छ । त्यस्तै महिलातर्फ चन्द्रागिरी नगर पालिका न्यू डायमण्ड स्पोर्टस क्लब, आयोजक गण्डकी प्रदेश संगै ३ विभागिय टोली नेपाल पुलिस क्लब, त्रिभुवन आर्मी क्लबको र एपिएफ क्लब गरि ६ टोलीले प्रतिस्पर्धा गर्नेछन्।

पुरुषतर्फ श्रीलंकाको आर्मी टिमले पहिलो पटक सहभागिता जनाउने भएको छ । त्यस्तै हेल्प नेपाल स्पोर्टस क्लब, आयोजक टोली गण्डकी तथा ३ विभागिय टोली पुलिस, सेना र एपिएफले चुनौती पेश गर्नेछन्।
आयोजक टोलीले उपाधि रक्षाका लागि विदेशी खेलाडी भित्राउने तयारी गरिरहेको अध्यक्ष शर्माले बताए ।

दुबैतर्फको विजेता टोलीले समान ५ लाख ५५ हजार ५ सय ५५ , दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।

दुबैतर्फका सर्वोत्कृष्ट खेलाडीले २५ हजार ५ सय ५५ तथा विद्यागत उत्कृष्टले जनही१० हजार ५ सय ५५ रुपैयाँ प्राप्त गर्नेछन् । हरेक खेलको प्लेयर अफ दि म्याचले केल्मी र एक्सटेपको टिसर्ट प्राप्त गर्नेछन् ।

तेस्रो संस्करणको उपाधि पुरुषतर्फ गण्डकी प्रदेश र महिलातर्फ एपिएएफले जितेकाे थियो।