सुर्खेत (हाम्रो खेलकुद)- नेपाल‌ पुलिस क्लबले सुर्खेतमा जारी ३४ औं राष्ट्रिय पुरुष भलिबल प्रतियोगिताको दोस्रो सेमिफाइनलमा‌ अर्को विभागिय टोली त्रिभुवन आर्मी क्लबको‌ सामना गर्ने भएको छ।

वीरेन्द्रनगरको खुलामञ्चको कोर्टमा मंगलबार कोशी प्रदेशलाई‌ ३-० को सोझो सेटमा पराजित गर्दै पुलिस समूह ‘ए’ को उप विजेता बनेको छ ।

लिग चरणको तेस्रो खेल जित्ने क्रममा पुलिसले कोशीलाई २५-१५,२५-१९ र २५-११ ले हराएको थियो। कोशी यसअघि नै प्रतियोगिताबाट बाहिरिसकेको थियो। पुलिसले साविक विजेता एपिएफसँगको खेल गुमाएको थियो।

आजै एपिएफ र आर्मी आ आफ्नो समूहको विजेता बनेका छन् । वीरेन्द्रनगरको खुलामञ्चको कोर्टमा मंगलबार समूह ‘ए’ मा एपिएफले बागमती प्रदेशलाई‌ र समूह ‘बी’ आर्मीले मधेशलाई समान ३-० ले हराउँदै आफ्नो समूहका विजेता हुन् ।

प्रतियोगिताका‌ अपराजित यी दुई टोली सोमबार नै सेमिफाइनल पुगिसकेका थिए। दिनको पहिलो खेलमा एपिएफले बागमतीलाई २५-७,२५-१८ र २५-१३ ले हराएको थियो।

दिनको दोस्रो खेलमा आर्मीले मधेशलाई २५-२०, २५-१९ र २५-१४ ले पराजित गरेको थियो। एपिएफ र आर्मी दुबै टोली आजको खेलमा आफ्नो पहिलो रोजाइका खेलाडीलाई‌ आराम दिएको‌ थियो।

लिगका सबै ४ खेल हार्नेमा बागमती एक्लो टोली रह्यो ।
एपिएफ, पुलिस, कोशी र लुम्बिनी प्रदेश कुनै पनि टोली विरुद्ध बागमतीले एक‌ सेट पनि जित्न सकेन ।

समूह ‘बी’ बाट सेमिफाइनल पुग्ने दोस्रो टोलीको निर्णय आज हुने गण्डकी प्रदेश र घरेलु टोली कर्णालीको‌ खेलपछि टुंगो लाग्ने छ। यसअघि ३ खेलमा गण्डकीले २ खेल र कर्णालीले १ खेल जितेको थियो। कर्णालीले सोझो सेटले जित्ने बाहेक सबै खाले नतिजाले गण्डकी सेमिफाइनल पुग्नेछ।

समूह ‘बी’ को‌ उपविजेताले बुधबार हुने पहिलो सेमिफाइनलमा एपिएफको सामना गर्नेछ। नेपाल भलिबल संघको आयोजना र कर्णाली प्रदेश भलिबल संघको व्यवस्थापनमा भइरहेको प्रतियोगिताको फाइनल पुस २६ गते हुनेछ ।