पोखरा (हाम्रो खेलकुद)– महिलातर्फको साविक विजेता एपिएफ र नेपाल पुलिस क्लबबीच खेलसँगै चौथो टाइगर कप अन्तर्राष्ट्रिय आमन्त्रण भलिबल क्लब च्याम्पियनसिप सोमबार सुरु हुँदैछ । खेल बिहान ८ः३० बजे सुरु हुनेछ ।

आयोजक टाइगर ग्रुप अफ पोखरा नेपालले आइतबार पत्रकार सम्मेलन गर्दै खेल तालिका सार्वजिक गरेको छ । महिला र पुरुषतर्फ समान ६ टोली सहभागी छन् । दुबैतर्फ समान ३ टोलीले समूह चरणमा प्रतिस्पर्धा गर्नेछन् ।

महिलातर्फ समूह एमा एपिएफ र पुलिसका साथ घरेलु टोली गण्डकी प्रदेश रहेको छ । त्रिभुवन आर्मी क्लब, चन्द्रागिरी नगरपालिका न्यु डायमण्ड महिला टिम र भारतीय हरियाणा टिम रहेको छ । पुरुषतर्फ सविक विजेता घरेलु टोली गण्डकी, पूर्व विजेता आर्मी र हेल्प नेपाल स्पोर्टस क्लब रहेका छन् । एपिएफ, पुलिस र श्रीलंका आर्मी टिम छन् ।

लिग कम नकआउट र सेमिफाइनलमा हरेक दिन ४ खेल हुनेछन् । पहिलो दिन महिलातर्फको दोस्रो खेलमा आर्मी र न्यु डायमण्ड आमनेसामने हुनेछन् । पुरुषतर्फ पहिलो दिन १२ः३० बजे एपिएफ र पुलिस तथा अर्को खेल गण्डकी र आर्मीबीच हुनेछ ।

पुलिस र एपिएफ तथा गण्डकी र आर्मीबीच ४ दिनपछि दोस्रो पटक प्रतिस्पर्धा हुनेछ । पुस २६ गते कर्णालीको सुर्खेतमा सम्पन्न ३४ औं राष्ट्रिय पुरुष भलिबलको फाइलनमा पुलिसले एपिएफलाई ३–१ ले हराएको थियो । सोही दिन तेस्रो स्थानको प्रतिस्पर्धामा गण्डकीले आर्मीलाई ३–१ ले नै हराएको थियो । टाइगर कपको अन्तिम दुई दिन समान २ खेल हुनेछन् । दुबैतर्फको तेस्रो स्थानको खेल माघ ५ गते र फाइनल माघ ६ गते हुनेछ ।

प्रतियोगिताका लागि सबै तयारी पूरा भएको पत्रकार सम्मेलनमा आयोजक टाइगर ग्रुपका अध्यक्ष नारायणप्रसाद शर्माले जानकारी दिए । सहभागी सबै टोलीले पोखरा आइसकेका जानकारी दिदै अध्यक्ष शर्माले पोखरा रंगशाला हाता भित्रको भलिबल ट्रेनिङ सेन्टरमा करिव १० हजार दर्शक क्षमताको प्यारापिट तयार पारिएको छ ।

दुबैतर्फको विजेता टोलीले समान ५ लाख ५५ हजार ५ सय ५५ , दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।