काठमाडौं (हाम्रो खेलकुद) –  एपिएफ टाइगर कप भलिबल प्रतियोगिता महिलातर्फको उपाधि रक्षाको‌ बाटोमा एक कदम अगाडि बढेको‌ छ ।

गण्डकी प्रदेशलाई बुधबार ३-० को‌ सोझो सेटमा हराउँदै एपिएफ समूह एको विजेताका रुपमा सेमिफाइनलमा पुगेको छ ।

पोखरा रंगशाला हाता भित्रको भलिबल कोर्टमा भएको खेलमा सहज जित हासिल गर्ने क्रममा एपिएफले गण्डकीलाई २५-१६,२५-९ र २५-१७ ले हराएको थियो। मंगलबार गण्डकीलाई ३-० हराउँदै नेपाल पुलिस क्लबलाई सेमिफाइनलमा पुगिसकेको थियो।

एपिएफ ५ अंकसहित विजेता, ४ अंक उपविजेता हुँदा गण्डकी अंक विहिन रहँदै प्रतियोगिताबाट बाहिरिसकेको छ ।
समूह ‘बी’बाट चन्द्रागिरी नगरपालिका महिला टिम सेमिफाइनलमा पुगिसकेको छ । न्यु डायमण्ड र भारतको हरियाणा पुलिस टिमबीच आज हुने खेलपछि समूहबाट सेमिफाइनल पुग्ने दोस्रो टोलीको टुंगो लागेको छ ।

पुरुषतर्फ सविक विजेता घरेलु टोली गण्डकी, पूर्व विजेता आर्मी र हेल्प नेपाल स्पोर्टस क्लब समूह ‘ए’ तथा एपिएफ, पुलिस र श्रीलंका आर्मी टिम समूह ‘बी’ मा छन् । महिलातर्फ समूह ‘ए’मा एपिएफ र पुलिसका साथ गण्डकी तथा समूह ‘बी’ मा आर्मी, न्यु डायमण्ड र भारतीय हरियाणा टिम छन् ।

आज पुरुषतर्फ दुई खेल हुनेछ । पुलिस र श्रीलंका आर्मी टिमबीच १२:३० बजे र घरेलु टोली गण्डकी र हेल्प नेपालबीच २:३० बजे खेल सुरु हुनेछ।

महिला र पुरुष दुवै तर्फको विजेता टोलीले समान ५ लाख ५५ हजार ५ सय ५५, दोस्रो हुनेले २ लाख ५५ हजार ५ सय ५५ तथा तेस्रो हुनेले १ लाख २५ हजार ५ सय ५५ रुपैयाँ प्राप्त गर्नेछन् ।