काठमाडौं (हाम्रो खेलकुद)- नेपालका नम्बर एक एमेच्योर गल्फर सदभाव आचार्यले एसिया-प्यासिफिक एमेच्योर च्याम्पियनसिपमा नेपालको प्रतिनिधित्व गर्ने भएका छन् ।

सदभावलाई राष्ट्रिय खेलकुद परिषद (राखेप) का सदस्य सचिव टंक लाल घिसिङले आइतवार बिदाइ गरे। सदस्य सचिव घिसिङले एसियाका टप एमेच्योर गल्फर आउने यो प्रतियोगितामा उत्कृष्ट प्रदर्शनका लागि शुभकामना दिए।

नेपाल गल्फ संघका अध्यक्ष टासी घलेले एसिया-प्यासिफिक एमेच्योर च्याम्पियनसिपमा सदभावले उत्कृष्ट प्रदर्शन गर्नेमा विश्वस्त रहेको बताए। उनले एसियन गेम्स र ओलम्पिक गेम्समा मेडल सम्भावना रहेको हुनाले सरकार र राखेपको तर्फबाट सहयोग गर्न आग्रह गरे।

सदभावले एसियाकै ठुलो प्रतियोगितामा खेल्न पाउनुलाई अवसरको रूपमा लिएको बताए। च्याम्पियनसिप जापानको गोटेम्बा स्थित ताहियो क्लबमा असोज १७ गतेदेखि २० गतेसम्म हुनेछ।

विश्व वरियताको आधारमा सदभावले यो अवसर पाएका हुन। सदभावले यो च्याम्पियनसिप यसअघि दुई पटक खेलिसकेका छन। यो पटक भने उत्कृष्ट नतिजाका लागि अमेरिकामा दुई महिनाको विशेष प्रशिक्षण लिएर नेपाल फर्किएका हुन्। यो क्रममा उनले जुनियर प्लेयर्स च्याम्पियनसिप पनि खेलेका थिए।‌

नेपालबाट टासी छिरिङले पनि भाग लिन छनोट भएका थिए। तर केहि दिन अगाडि चोट लागेको कारण टासीले यो च्याम्पियनसिप नखेल्ने भएका छन् । सदभाव आजै जापानको लागि प्रस्थान गर्नेछन्। सदभावले गत मेमा एएसी कै निमन्त्रणामा अहिले हुने च्याम्पियनसिपको गल्फ कोर्समा पनि प्रशिक्षण गरिसकेका छन्।