काठमाडौं (हाम्रो खेलकुद)– दी अन्तराष्ट्रिय इन्भिटेसनल सिरिजको उपाधि नवाङ पासाङ शेर्पा र दावा सोनाम शेर्पाले जितेका छन्। उनीहरूले आ-आफ्नो ह्यान्डीक्याप क्याटगरिमा उपाधि जित्दै फाइनल सिरिजमा स्थान बनाएका हुन्।

गोकर्ण गल्फ क्लबमा शनिवार भएको प्रतियोगितामा १३ वा सो भन्दा बढी ह्यान्डीक्यापतर्फ उपाधि जित्ने क्रममा नवाङले ४२ अंक जोडे। फुर्साङ लामा ३७ अंक सहित दोस्रो र आरती राना ३६ अंक जोडेर तेस्रो भए।

शुन्यदेखि बाह्र ह्यान्डीक्यापमा दावाले ४१ अंक सहित उपाधि आफ्नो नाममा लेखाए। गौरव शाह दोस्रो र जिग्मे दोङसेट्स्टान तेस्रो भए। उनीहरूले क्रमशः ३६ र ३४ अंक बनाए।

यसैगरी सबै सहभागीको लागि खुल्ला गरिएको चिपिङ कम्पिटिसनमा पवन बिष्ट पहिलो भए। यो तीन स्पर्धाको विजेता दी इन्टरनेशनल सिरिज फाइनलमा नेपालबाट छनोट भए। यो फाइनल अर्को महिना दुबईमा हुनेछ।

यसैगरी सोनाम नोर्बु लामाले क्लोजेस्ट टु दी पिन, प्रविण शाही ठकुरीले लङ्गेस्ट ड्राइभ र सुनिल‌ कार्कीले बिट-दी-प्रोतर्फको उपाधि जिते। प्रतियोगिता स्टेबलफोर्ड ३/४ ह्यान्डीक्याप फरम्याटमस खेलाइएको थियो।

ओमा इमिरेटसको प्रायोजनमा सम्पन्न एकदिने प्रतियोगितामा ९८ गल्फरले सहभागिता रहेको थियो। विजयी खेलाडीहरूलाई आजै पुरस्कार बितरण गरियो।