ललितपुर (हाम्रो खेलकुद)- नेपाल ओलम्पिक कमिटी (एनओसी) को सातदोबाटो स्थित कार्यालय प्रवेशमा प्रहरीदले रोक लगाएको छ।

शनिवार हुने एनओसीको निर्वाचनका लागि आज बिहान १० बजेदेखि मनोनयन दर्ता गर्ने समय तय भएको थियो। १० बजेदेखि दिउँसो २ बजेसम्म मनोनयन दर्ता गर्ने भनिएपनि बिहान ७ बजेदेखि नै प्रहरीले एनओसी भवनमा प्रवेश निषेध गरेको छ।

एनओसीमा रहेका प्रहरी निरीक्षकले गृह मन्त्रालयको आदेशमा प्रवेश निषेध गरिएको हाम्रो खेलकुद डटकमलाई बताए।

यस विषयमा युवा तथा खेलकुद मन्त्री तेजुलाल चौधरीलाई सम्पर्क गर्दा एनओसीले विशेष साधारण सभा रोक्न अदालतको स्टे अर्डर समेत नमानेको कारण यो कदम चालेको बताए।

युवा तथा खेलकुद मन्त्रालय मार्फत गृहले एनओसी भवन नियन्त्रणमा लिएको हो। अदालतको आदेश नमानेसम्म निर्वाचन हुन नदिने मन्त्री चौधरीले स्पष्ट पारेका छन्।

एनओसीका उपाध्यक्ष चतुरानन्द राज वैद्यले आधिकारिक रूपमा अदालतको स्टे अर्डरको जानकारी विशेष साधारण सभापछि मात्र प्राप्त भएको तर्क गरेका छन्।

यसअघि एनओसीको विशेष साधारणसभाले नेतृत्वको कार्यकाल सम्बन्धि प्रावधानलाई संशोधन गरेको थियो। दुई तिहाई सदस्यले अध्यक्ष र महासचिवले अब ४ पटकसम्म उम्मेदवार बन्न पाउने गरी विधान संशोधन गरेको थियो।

लगातार अथवा फरक समयमा चार पटक अध्यक्ष वा महासचिव बन्न मिल्ने विधान अन्तराष्ट्रिय ओलम्पिक कमिटि (आईओसी) को चार्टर अनुसार संशोधन गरिएको दाबी गरिएको थियो।

एनओसीका वर्तमान अध्यक्ष जीवनराम श्रेष्ठको दोस्रो कार्यकाल पूरा भइसकेको छ। यो विधान संशोधनसँगै उनको लागि तेस्रो कार्यकालको लागि उम्मेदवारीको ढोका खुलेको थियो।