काठमाडौं (हाम्रो खेलकुद)- नेपाल नम्बर दुई गल्फर निरज तामाङले सूर्य नेपाल एनपिजिए म्याच-प्लेको उपाधि  जितेका छन्।

सूर्य नेपाल गल्फ टुर २०२४-२५ अन्तर्गत छैटौं प्रतियोगिताका रुपमा रहेको म्याच प्लेको ३६ होलको फाइनल प्रतिस्पर्धामा आठौं वरियताका धन बहादुर थापालाई ५/४ ले हराउँदै निरज सिजनको तेस्रो उपाधि जिते । उनको यो करियरको चौथो उपाधि हो। 

रोयल नेपाल गल्फ क्लबमा बिहीवार भएको फाइनल प्रतिस्पर्धामा निरजले धनलाई पहिलो नौ होलमा २-होलले पछि पारे। यसपछि १८ होल सकिंदा निरजले ६-होलको फराकिलो अग्रता बनाए।

एकपक्षीय जितको नजिक निरज पुगेका थिए। तर धनले सहजै हार मानेनन्। २७ होलको समाप्तिमा अग्रता ५-होलमा छोट्याए। यसपछि ३२ औं होलको खेल बराबरीमा सकिएसँगै निरजले ४ होल अगाडि उपाधि जिते। 

उपाधिसँगै निरजले ६० हजार रुपैयाँ प्राप्त गरे । धनले ४२ हजार रुपैयाँ पाए। निरजले पहिलो चरणमा सूर्य प्रसाद शर्मा, क्वाटरफाइनलमा रामे मगर र सेमिफाइनलमा दिनेश प्रजापतिलाई हराएका थिए। निरजले यो सिजन सूर्य नेपाल वेस्टर्न ओपन र सूर्य नेपाल इस्टर्न ओपनको उपाधि जितेका थिए। 

डिफेन्डिङ च्याम्पियन दिनेश प्रजापतिलेे तेस्रो स्थान प्राप्त गरे। दिनेशले रवि खड्कालाई १८ होलको प्रतिस्पर्धामा ४/२ ले माथ दिए। दिनेशले ३२ हजार र रविले २४ हजार रुपैयाँ प्राप्त गरे । 

क्वाटरफाइनलमा पराजित नेपाल नम्बर एक भुवन नगरकोटी, तोरण विक्रम शाही, रामे मगर र प्रदीप कुमार लामाले समान ११ हजार रुपैयाँ प्राप्त गरे।

पहिलो चरणमा पराजित हुने पशुपति शर्मा, भुवन कुमार रोक्का, टंक बहादुर कार्की, सञ्जय लाम, जयराम श्रेष्ठ, रमेश अधिकारी दीपक मगर र सूर्य प्रसाद शर्माले जनही ६ हजार रुपैयाँ प्राप्त गरे। 

सन् २०२३-२४ को अर्डर अफ मेरिटको आधारमा १६ प्रोफेसनल गल्फरले प्रतिस्पर्धा गरेका थिए

प्रतियोगिताको कुल २ लाख ५० हजार रुपैयाँ रहेको थियो। प्रतियोगिताका विजयी खेलाडीहरुलाई सूर्य नेपाल प्रालिका डेप्युटी जेनरल मेनेजर (मार्केटिङ) केशव प्रधान र नेपाल गल्फ संघका अध्यक्ष टासी घलेले पुरस्कार वितरण गरे।