काठमाडौं (हाम्रो खेलकुद)- प्रोफेसनल गल्फ टुर अफ इन्डिया (पिजिटिआई) अन्तर्गत पलेयर्स च्याम्पियनसिपको पहिलो दिन नेपालका प्रो गल्फर सुवाश तामाङ उत्कृष्ट प्रदर्शनका साथ संयुक्त रुपमा दोस्रो स्थानमा रहेका छन्।

भारतस्थित तमिलनाडुको पार-७१ कोक्लोभर ग्रीन्स गोल्फ कोर्स एन्ड रिसोर्टमा आज सुबाशले ७-अन्डर ६४ को उत्कृष्ट स्कोरमा पहिलो १८ होलको खेल सकाए।

१०औं होलबाट दिनको सुरुवात गरेका सुवासले १३औं देखि १५औं होलसम्म लगातार तीन बर्डी सहित फ्रन्ट नाइन बोगी रहित ३-अन्डर ३१ मा सकाए।

यसपछि दोस्रो, तेस्रो, पाँचौं, सातौं र आठौं होलमा पनि बर्डी प्रहार गर्न दफल रहँदा नवौं होलमा एक सट खेर फाले। बमयाक नाइन ४-अन्डर ३३ मा पुरा गरे।

यो स्कोरमा सुबाश भारतीय प्रो सौर्य भट्टाचार्य र मिलिन्द सोनीसँग संयुक्तरुपमा दोस्रो स्थानमा रहे।

भारतका युवराज सान्डु ८-अन्डर ६३ को स्कोरमा शीर्षस्थानमा रहेका छन्। सुबाश लिडर युवराज भन्दा एक स्ट्रोकले पछि रहेका छन्।

अर्को नेपाली गल्फर शुक्र बहादुर राईले खराब प्रदर्शन गरे। उनले आज ४-ओभर ७५ को स्कोरमा खेल सकाए। उनी संयुक्तरुपमा ९४ औं स्थानमा छन्। प्रतियोगितामा १ सय २४ गल्फरको सहभागिता रहेको छ।

यो प्रतियोगिताको कुल नगद पुरस्कार भारू १ करोड रूपैयाँ रहेको छ।