काठमाडौं (हाम्रो खेलकुद)- स्थगित एभरेष्ट महिला भलिबल लिग ( इडब्लुभी) त्यहिबाट सुरु हुने भएको छ। यद्दपी कहिलेबाट सुरु हुने भन्ने मिति तय भएको छैन।

जेनजी पुस्ताले भदौ २३ र २४ गते गरेको आन्दोलनपछि पोखरा भइरहेको इडब्लुभी स्थगित गरिएको थियो।
इडब्लुभीकी प्रमुख कार्यकारी अधिकृत स्नेभी चापागाईंले आज जारी विज्ञप्तिमा आन्दोलनका क्रममा सहादतप्रति श्रद्धाञ्जली र परिवारजनप्रति समवेदना व्यक्त गरेकी छिन्।

१६ खेलमध्ये स्थगित हुनुअघि ९ खेल सम्पन्न भइसकेको थियो । बाँकी ७ खेललाई उपयुक्त समयमा निरन्तरता दिने तयारी गरिएको विज्ञप्तिमा उल्लेख छ। बाँकी खेलको नयाँ मिति नेपाल भलिबल संघ, ६ फ्रेन्चाइजी टोली र प्रायोजकसँग समन्वय गरी घोषणा गरिने बताइएको छ।

लिगका सहभागी सबै टोली काठमाडौं फर्किसकेका छन्। ११ देशका १८ विदेशी खेलाडी यसअघि नै स्वदेश फर्किसकेका‌ छन्।

जेनजी आन्दोलनका क्रममा पोखरा निन्जाज, काठमाडौं स्पाइकर्स तथा आयोजक बसेको होटलमा समेत आगजनी भएको थियो।

ललितपुर क्विन्स‌ र कर्णाली यशविजले समान ३ खेल जित्दै समान ९ अंक जोडेका छन्। मधेश युनाइटेड र काठमाडौं स्पाइकर्सले समान ३ अंक, लुम्बिनी लाभाजले २ अंक र पोखरा निन्जाजको अंक छ। लिग चरणमा सबै टोलीले समान ३ खेल खेलिसकेपछि स्थगित भएको थियो।