काठमाडौं (हाम्रो खेलकुद)- नेपाली राष्ट्रिय पुरुष भलिबल टोलीको प्रारम्भिक खेलाडी छनोटको विषय प्रति गण्डकी प्रदेश भलिबल संघले आपत्ति जनाएको छ।

पछिल्लो प्रदर्शनको आधारमा राष्ट्रिय टोलीको प्रारम्भिक १८ जना खेलाडीको सूची सार्वजनिक हुँदा आफ्नो प्रदेशको एक जना खेलाडी पनि नपरेको विषयमा गण्डकी भलिबलले प्रश्न खडा गरेको छ।‌

आफु‌ खुसी निकटका खेलाडीलाई छनोट गरेको उल्लेख गर्दै त्यहि कारण गण्डकी प्रदेशका खेलाडी माथि अन्याय भएको आरोप गण्डकी भलिबलले लगाएको छ।

छनोट प्रक्रिया बारे यथाशीघ्र पुनर्विचार गर्न माग गर्दै त्यसो नभएको खण्डमा नेपाल भलिबल संघबाट आयोजना गरिने कुनैपनि प्रतियोगिता तथा कार्यक्रममा गण्डकीको सहभागिता र सहयोग समेत नरहने चेतावनी दिएको छ।‌

गण्डकीले भलिबल संघका उपाध्यक्ष तथा काभा पुरुष नेसन्स लिग-२०२५ राष्ट्रिय पुरुष टिम छनोट समितिका संयोजक भरत शाहलाई पत्र लेख्दै असन्तुष्टि जनाएको हो।

गण्डकी पछिल्लो समय भलिबलमा उत्कृष्ट टोलीको परिचय बनाउन सफल भैसकेको र उसले विभागीय टोलीलाई समेत हराउँदै आए उल्लेख गर्दै त्यहाँबाट खेलाडी नपर्नेुमा दुःख मनाउ गरेको छ ‌।

बंगलादेशको ढाकामा ५ गते देखि ११ गतेसम्म हुने काभा मेन्स नेसन्स लिग २०२५ को लागि खेलाडी छनोट विवादित बनेको छ।

खेलाडी छनोटको विषयमा विवाद बढ्दै राष्ट्रिय खेलकुद परिषद् (राखेप) को भलिबलका मुख्य प्रशिक्षक जगदीश भट्टले राखेपसँग सम्बन्धित बाहेक भलिबलका सबै भूमिकाबाट अलग हुने सामाजिक सन्जालमार्फत घोषणा गरेका थिए।