काठमाडौं (हाम्रो खेलकुद) – नेपाली बक्सर मनोहर बस्नेत (म्याक्सी र भारतीय बक्सर अर्षदीप बुल्लारबीच शनिबार प्रोसेसनल बक्सिङ खेल हुनेछ । म्याक्स बक्सिङ प्रमोसनको आयोजनामा हुन लागेको च्याम्प अफ च्याम्पियन नाम राखिएको उक्त बक्सिङ खेल दुवै बक्सरको लागि प्रोफसन बक्सिङमा डेब्यु खेल हुनेछ । उनीहरुले लाइट हेभीवेट क्याटगोरीमा प्रतिस्पर्धा गर्नेछ ।

यो प्रतिस्पर्धालाई नेपाल र भारतबीचको प्रो बक्सिङ खेलको रुपमा हेरिएको छ । च्याम्प अफ च्याम्प लगनखेलस्थित सैनिक शारीरिक तथा तालिम केन्द्रको हलमा दिउसो ३ बजेपछि हुनेछ । सोही दिन नै च्याम्प अफ च्याम्प सिजन फस्टको खेलाडीहरु र त्रिभुवन आर्मी क्लबका बक्सरबीच खेल हुने म्याक्स बक्सिङ प्रमोशनका म्याक्स बस्नेतले जानकारी दिए ।

च्याम्पका आकाश सुवेदी र च्याम्पकै सनिल शाहीले लाइट तौल समूहमा प्रतिस्पर्धा गर्नेछ । सोही तौल समुहमा च्याम्पका यादव थापाले आर्मीका नरेश देवानसँग खेल्नेछ । च्याम्पका सविन गुरुङले आर्मीका सुरेश नेपाली र च्याम्पका अनुज भण्डारीले दान बहादुर दलामीसँग वेल्टर तौल समूहमा प्रतिस्पर्धा गर्नेछ ।

सबै फाइट ५ बाउटको हुनेछ । हरेक तौल समूहका विजेताले १० हजार रुपैया पाउने छ । म्याक्स बक्सिङका म्याक्सले नेपाली बक्सिङमा यो प्रतियोगिता प्रोफेसनल बक्सिङका लागि शुरुवात हुने बताए । यस प्रतियोगितालाई साखः स्टिलले मुख्य प्रायोजन गरेको छ । विभिन्न संघ सस्थाहरुले पनि सहयोग गरेको छ ।