काठमाडौं (हाम्रो खेलकुद) – चिनिया कम्पनी एजिलिटी हेल्थ एन्ड वेलनेस ग्रुपले आसन्न एसियाडमा सहभागिता जनाउने नेपाली टिमलाई स्पोर्टस् किट प्रदान गरेको छ । शुक्रबार सातदोबाटोस्थित नेपाल ओलम्पिक भवनमा आयोजित कार्यक्रममा चिनिया कम्पनी एजिलिटी हेल्थ एन्ड वेलनेस ग्रुपका सिइओ अलफोर्ड चाङले स्पोर्टस् किट नेपाल ओलम्पिक कमिटिका अध्यक्ष जीवनराम श्रेष्ठलाई हस्तान्तरण गरे ।

एजिलिटीले करिव ८० लाख बराबरको चार सय थान स्पोर्टस् किट हस्तान्तरण गरेको हो । जसमा ट्याकसुट १ जोर, जुत्ता १ जोर, टिसर्ट २ जोर, मोजा १ जोर कट्टु १ जोर, ब्याग १ जोर र १ क्याप रहेका छन् । एसियन गेम्समा सहभागी खेलाडीहरुले अब एजिलिटीले प्रदान गरेको ओलम्पिक र एजिलिटीको लोगो अंकित ड्रेस लगाउने छ । जसअनुसार नेपालले सहभागिता जनाएका विभिन्न २९ खेलका खेलाडीहरुको ड्रेसमा एकरुपता हुनेछ ।

स्पोर्टस् किट ग्रहण गर्दै ओलम्पिक कमिटिका अध्यक्ष श्रेष्ठले खेलाडीहरुले उच्च मनोवलका साथ प्रशिक्षण गरिरहेको र राम्रो नतिजा आउनेमा आफु विस्वस्त रहेको बताए । उनले नेपाली खेलकुद विकासमा चिनिया सरकारको पनि योगदान रहेको बताए । अध्यक्ष श्रेष्ठले गत अप्रिल १८ मा ओलम्पिक कमिटि र एजिलिटीबीच स्पोर्टस् किटको विषयमा सम्झौता भएअनुसार प्रक्रिया अघि बढेको बताए ।

एजिलिटीका अलफोर्ड चाङले नेपाल ओलम्पिक कमिटि र नेपाली खेलसँग जोडिन पाउनु कम्पनी र व्यक्तिगत रुपमा खुशीको विषय रहेको बताए । उनले आसन्न एसियाडमा राम्रो नतिजाको अपेक्षा गरिएको समेत बताए । इन्डोनेसियाको जाकार्ता र पालेङवाङमा अगस्ट १८ देखि ३ सेप्टेम्बर सम्म हुने एसियाडमा नेपालले २९ खेलमा सहभागिता जनाएको छ । जसमा १ सय ८५ जना खेलाडी रहनेछन् ।