काठमाडौं (हाम्रो खेलकुद) –  टोकियो ओलम्पिक (सन् २०२०) आयोजक राष्ट्र जापानले ओलम्पिक अघिसम्म नेपाली खेलाडीहरुलाई सहयोग गर्ने भएको छ । ओलम्पिक अघिसम्म नेपाली खेलाडीलाई सहयोग गर्ने सम्बन्धमा शुक्रबार नेपाल ओलम्पिक कमिटिले ओलम्पिक आयोजक राष्ट्र जापानको फुकुसीमामा अवस्थित तामुरा सिटी र एथलेट सोसाइटीसँग सम्झौता गरेको छ ।

सम्झौतामा नेपाल ओलम्पिक कमिटिका अध्यक्ष जीवनराम श्रेष्ठ र एथलेट सोसाइटीका महासचिव डा. ओकी सोकोले हस्ताक्षर गरे । सम्झौताअनुसार तामुरा सिटी र एथलेट सोसाइटीले ओलम्पिकलाई छानिने सम्भावना भएको खेल र खेलाडीलाई प्रशिक्षणको व्यवस्था मिलाउनेछ । प्रशिक्षण नेपाल वा जापान हुन सक्ने एनओसी अध्यक्ष श्रेष्ठले जानकारी गराए ।

‘आज ओलम्पिक कमिटिले तामुरा सिटी र एथलेट सोसाइटीसँग सम्झौता गरेको छ । यो सम्झौता टोकियो ओलम्पिक २०२० सम्म रहनेछ । तामुरा सिटीले आर्थिक पाटो हेर्नेछ । एथलेटले टेक्निकल भागमा सहयोग गर्ने सम्झौता भएको छ ’ ओलम्पिक कमिटिका अध्यक्ष श्रेष्ठले पत्रकार सम्मेलनमा भने, ‘हामीले पोटेन्सियल खेल भएका खेलाडीलाई पठाउनेछौ । उनीहरुले विशेष गरी म्याराथनलाई बढी प्राथमिकतामा राखेको छ । अन्य सम्भावित खेलहरु पनि हुनेछ ।’

अध्यक्ष श्रेष्ठले टोकियो ओलम्पिकका लागि नेपालले वाइल्ड कार्डबाट मात्रै नभएर छनोट चरण पार गरेरै खेल्नको लागि तयारी भैरहेको समेत बताएका छन् । सम्झौता अनुसार शनिबारबाटै तामुरा सिटी र एथलेट सिटीले म्याराथनको प्रशिक्षण शुरुवात गर्नेछ । जसलाई बेइजिङ ओलम्पिक सन् २००८ का ओलम्पियन युरिका नाकामुराले एनओसी भवन र लगनखेलस्थित आर्मीको मैदानमा प्रशिक्षण दिनेछन् ।