पोखरा (हाम्रो खेलकुद) –हेल्प नेपाल स्पोर्टस् क्लब र र विभागीय त्रिभुवन आर्मी क्लबले पोखरामा आइतबारबाट सुरु भएको चौथो आरआरबी एनभिए क्लब लिग भलिबल च्याम्पियनसिपमा विजयी सुरुवात गरेको छ ।

पोखरास्थित पोखरा रंगशालाको भलिबल कोर्टमा आइतबार भएको खेलमा विभागीय त्रिभुवन आर्मी क्लबले काठमाडौंको जावलाखेल भलिबल ट्रेनिङ सेन्टरलाई ३–० को सोझो सेटमा पराजित गर्दै विजयी सुरुवात गरेको हो । आर्मीले जावलाखेलमाथि पहिलो सेटमा २५–१९ को सहज जित निकालेको थियो । दोस्रो सेटमा २५–१५ को जित दर्ता गर्दा तेस्रो सेटमा २५–११ को सहज जित निकाल्न सफल भयो ।

आइतबारै भएको दोस्रो खेलमा हेल्प नेपाल स्पोर्टस् क्लबले ढोरपाटन क्लबमाथि ३–१ को जित निकाल्यो । पहिलो सेट २५–१८ ले जितेको हेल्प नेपालले दोस्रो सेट १७–२५ ले गुमाएको थियो । प्रतिस्पर्धात्मक बनेको तेस्रो सेटमा हेल्प नेपालले २७–२५ को संघर्षपूर्ण जित निकाल्दा चौथो सेटमा २५–१४ को सहज जित निकाल्यो ।

आइतबार भएको अर्को खेलमा विभागीय नेपाल पुलिस क्लबले रुपन्देहीको मणिमुकुण्द भलिबल क्लबलाई ३–० को सोझे सेटमा पराजित गर्दै विजयी सुरुवात गरेको छ । पुलिसले मणिमुकुन्दमाथि २५–२०, २५–१२ र २५–२१ को सहज जित निकाल्यो । पहिलो दिनको अन्तिम खेलमा वभागीय नेपाल एपिएफ क्लबले काठमाडौंको नयाँ बजार क्लबलाई २५–२०, २५–१२ र २५–२१ को सेटले पराजित ग¥यो

प्रतियोगितामा चौथो एनभिए राष्ट्रिय च्याम्पियनसिपमा सहभागी १२ टिममध्ये उत्कृष्ट ८ टोलीले प्रतिस्पर्धा गर्दैछन् । राउन्ड रोविन लिगको आधारमा हुने प्रतियोगिताका सबै खेलहरु पोखरा रंगशालास्थित भलिबल कोर्टमा ७ पुससम्म हुनेछ ।

प्रतियोगितामा तीन विभागीय टोली आर्मी, पुलिस र एपिएफसँगै बुटवलको मणिमुकुन्द भलिबल क्लब, जावलाखेल भलिबल प्रशिक्षण केन्द्र, ढोरपाटन क्लब, हेल्प नेपाल स्पोर्टस् क्लब र नयाँबजार युवा क्लब रहेका छन् ।

प्रतियोगिताको विजेताले २ लाख रुपैयाँ प्राप्त गर्नेछ । दोस्रो हुने टोलीले १ लाख रुपैयाँ पाउनेछ । तेस्रो र चौथो हुनेले क्रमशस् ५० र २५ हजार रूपैयाँ प्राप्त गर्नेछन् । व्यक्तिगत विधातर्फ उत्कृष्ट लिबेरो, उत्कृष्ट सर्भर, उत्कृष्ट ब्लकर, उत्कृष्ट लिफ्टर, उत्कृष्ट स्पाइकर र प्रशिक्षकले जनही ५–५ हजार रूपैयाँ पाउनेछन् ।