काठमाडौं (हाम्रो खेलकुद)– सातौं मिष्टर हिमालय शारीरिक सुगठन प्रतियोगिता तथा दोश्रो पुरुष फिट्नेस फिजिक्स तथा महिला एथलेटिक्स फिजिक्स आगमी बैशाख तेस्रो साता आयोजना हुने भएको छ ।

नेपाल शारीरिक सुगठन तथा फिटनेश संघल मंगलबार राजधानीमा पत्रकार सम्मेलनको आयोजना गर्दै प्रतियोगिता २०७६ बैशाख २० र २१ गते काठमाडौमा हुने जानकारी गराएको हो
संघले यो प्रतियोगितालाई आउदो असार ५ र ६ गते मा आयोजना हुने १२औं दक्षिण एशियाली शारीरिक सुगठन प्रतियोगिताको लागि छनोट प्रतियोगिताको रुपमा रहेको समेत बताएको छ ।
प्रतियोगताको मिस्टर हिमालयतर्फ ५५, ६०, ६५, ७०, ७५ र ७५ केजीमाथीको तौल गरि ६ वजन समूहमा प्रतिस्पर्धा हुनेछ ।
एउटा क्लब तथा संस्थाले प्रत्येक समूहमा बढिमा दुई खेलाडीलाई प्रतिस्पर्धा गराउन पाउने छ । प्रत्येक वजन समूहका खेलाडीबीच २० गते हुने प्रि–जजिङ चरणबाट २१ गते हुने अन्तिम चरणका लागि प्रत्येक वजन समूहका ५ खेलाडी छनोट गरिने छ ।
प्रत्येक वजन समूहका शीर्ष तीन स्थान हात पार्ने खेलाडीहरुले स्वर्ण, रजत र कास्य पदक, प्रमाण पत्रका साथै नगद २५, १५ र १० हजार प्राप्त गर्नेछन् । यस्तै चौथो र पाँचौ हुने खेलाडीले ट्रफी र प्रमाण पत्र प्राप्त गर्नेछन् ।
यस्तै प्रत्येक वजन समूहका प्रथम स्थान हात पार्ने खेलाडीहरुले मिष्टर हिमालय उपाधीका लागि प्रतिस्पर्धा गर्ने छन् । ओभरल प्रतिस्पर्धामा प्रथम हुने खेलाडीले ‘मिष्टर हिमालय’ उपाधिका साथै नगद २ लाख ५० हजारसहित ट्रफी तथा ब्यानेटले सुसज्जित हुँदै उपाधी हात पार्नेछ ।
प्रत्येक दुई बर्षमा आयोजना हुने मिस्टर हिमालय प्रतियोगिताकै दौरान शारीरिक सुगठन विधा अन्तरगत हुने दोश्रो पुरुष फिट्नेश फिजिक्स तथा महिला एथलेटिक्स फिजिक्सपनि आयोजना हुने छ ।
उक्त स्पर्धामा पुरुष तर्फ १७० सेमि र त्यो भन्दा माथि गरि दुई विधा तथा महिला एथलेटिक्स फिजिक्सका खेलाडीहरुलाई प्रिजजिङ्ग चरणमा प्रतिस्पर्धा गराई प्रत्येक समूहबाट ५ खेलाडी दोश्रो दिन हुने फाईनल चरणका लागि छनोट गरिने छ । फाईनल चरणमा शिर्ष तीन स्थान हात पार्ने खेलाडीहरुले स्वर्ण, रजत र कास्य पदक, प्रमाण पत्रका साथै नगद २५, १५ र १० हजार प्राप्त गर्ने छन् । यस्तै चौथो र पाँचौ हुने खेलाडीले ट्रफी र प्रमाण पत्र प्राप्त गर्नेछन् ।
काठमाण्डौमा संघले आयोजना गर्ने १२औं दक्षिण एशियाली शारीरिक सुगठन प्रतियोगितामा यस प्रतियोगिताबाट छानिएका खेलाडीहरुका साथै ३ बर्ष भित्र एशियन तथा विश्व शारीरिक सुगठन प्रतियोगितामा पदक हासिल गर्ने खेलाडीहरुलाई उनीहरुको क्षमताका आधार मानि संघको सिफरिसमा स्वतः प्रतिस्पर्धा गर्न पाउने प्रावधान रहेको समेट पत्रकार सम्मेलनमा जानकारी गराईयो । प्रतियोगिताको अनुमानित बजेट करिव २० लाख रहेको छ ।