काठमाडौं (हाम्रो खेलकुद) – तेस्रो संस्करणको पिंकाथन हाफ म्याराथन आउँदो शनिबार हुने भएको छ । आयोजक काठमाडौं पिंकाथनले मंगलबार राजधानीमा पत्रकार सम्मेलनको आयोजना गर्दै प्रतियोगिताको तेस्रो संस्करणको सम्पुर्ण तयारी पुरा भएको जानकारी गराएको हो ।
पिंकाथनमा हाफ म्याराथन, १० किलोमिटर, ५ किलोमिटर र ३ किलोमिटरमा हुनेछ । हाफ म्याराथनको विजेताले ५१ हजार रुपैयाँ हात पार्नेछन् । दोस्रो हुनेले ३१ हजार र तेस्रो हुनेले २१ हजार रुपैयाँ प्राप्त गर्ने आयोजकले जनाएको छ । यस्तै १० किलोमिटरको विजेताले ३१ हजार, दोस्रोले २१ हजार र तेस्रो हुनेले ११ हजार रुपैयाँ हात पार्नेछन् । ५ किलोमिटर दौडको विजेताले १० हजार रुपैयाँ पाउने छन् ।
दौडमा झन्डै २५ सय जनाको सहभागिता रहने काठमाडौं पिंकाथनका प्रबन्ध निर्देशक नमराज जोशीले जानकारी गराए । म्याराथनको रुट सोही दिनमा पक्का हुने आयोजकले जनाएको छ । पिंकाथानकी ब्राण्ड एम्बेसेडर नीति साहले महिला स्वास्थ्य र सशक्तीकरणको आवाज उठाउन पिंकाथानले समाजमा महत्त्वपूर्ण भूमिका खेल्ने बताइन् ।
यसपटक पिंकाथनमा नेपाल प्रहरीको पनि सहकार्य रहेको छ । नेपाल पुलिसको समुदाय साझेदारी कार्यक्रम अन्तर्गत समाजमा जनचेतना फैलाउन यस कार्यक्रमले निकै सहयोग पुग्ने प्रवक्ता उत्तमराज सुवेदीले बताए । पिंकाथनको समापन र अन्य कार्यक्रम नेपाल पुलिसको हेडक्वाटर नक्सालमा हुनेछ । अघिल्लो संस्करणमा नेपाल एपीएफ क्लबकी कान्छीमाया कोजु च्याम्पियन बनेकी थिइन् ।
