काठमाडौं (हाम्रो खेलकुद)– ब्याडमिन्टनकी पूर्व राष्ट्रिय च्याम्पियन सरादेवी तामाङले बुधबार डोटीका प्रज्वल श्रेष्ठसँग विवाह गरेकी छिन् ।
विवाह सरको घर भोजपुरमा भएको हो । प्रज्वल ब्याडमिन्टनका ‘ए’ लेभल उतिर्ण ब्याडमिन्टन प्रशिक्षक हुन् । सरादेवी नेपाली सेनाकी क्याप्टन हुन् । सराका बहिनी नङसलदेवी र भाई रत्नजित ब्याडमिन्टन खेलाडी हुन् । नङसलदेवी महिला र रत्नजित पुरुषतर्फ वरियताको शीर्षस्थानमा छन् ।
चोटका कारण पूर्व नम्बर एक सरा ब्याडमिन्टन कोर्टमा उत्रिएका छैनन् । उनी नेपालमै आयोजना हुने १३ औं दक्षिण एसियाली खेलकुद (साग) बाट कोर्टमा फर्कने तयारीमा छन् ।
सराका श्रीमान् प्रज्वल सटल टाइम नेपालका टुटर र बिडब्लुएफ लेभल वान प्रशिक्षक हुन् । प्रज्वल कामको सिलसिलामा भारतको बैंग्लोर गएको र त्यहाँ रहँदा ब्याडमिन्टन बैंग्लोर एकेडेमीमा काम गर्न सुरु गरेका थिए । त्यहाँ १ वर्ष काम गर्दै उनी आफैले एसपी एकेडेमी स्थापना गरेका छन् ।
